Այսօր Հայաստանի Կենտրոնական ընտրական հանձնաժողովում Հայաստանի Հանրապետական կուսակցությունն առաջադրեց ՀՀ գործող նախագահ Սերժ Սարգսյանի թեկնածությունը: Այս մասին «Առաջին լրատվական»-ի հետ զրույցում տեղեկացրին ՀՀ Կենտրոնական ընտրական հանձնաժողովից:
Մինչ օրս Հայաստանի Կենտրոնական ընտրական հանձնաժողով է դիմել ՀՀ նախագահի 4 թեկնածու, որոնցից 3-ը՝ երեկ: Երեկ ԿԸՀ իրենց փաստաթղթերն են ներկայացրել էպոսագետ Վարդան Սեդրակյանը, ԱԻՄ կուսակցության նախագահ Պարույր Հայրիկյանը և անկուսակցական Մհեր Հայրապետյանը: Առաջադրման առաջին օրը ոչ մի թեկնածու փաստաթղթեր չէր ներկայացրել ԿԸՀ:
Նշենք նաև, որ առաջիկա նախագահական ընտրություններին առաջադրվելու իրենց որոշման մասին հայտարարել են նաև «Ժառանգություն» կուսակցության առաջնորդ Րաֆֆի Հովհաննիսյանը և «Ազատություն» կուսակցության առաջնորդ, ԱԺ պատգամավոր Հրանտ Բագրատյանը:
Հիշեցնենք, որ գրանցման համար անհրաժեշտ փաստաթղթերը ԿԸՀ պետք է ներկայացվեն դեկտեմբերի 25-ից մինչև հունվարի 4-ը: Գրանցումը կկատարվի հունվարի 4-ից մինչև հունվարի 14-ի ժամը 18-ն ընկած ժամանակահատվածում:
Նախագահական ընտրությունների նախընտրական քարոզչության պաշտոնական մեկնարկը կտրվի հունվարի 21-ին և կավարտվի փետրվարի 16-ին: ԿԸՀ իրենց փաստաթղթերը ներկայացրած թեկնածուները կարող են ինքնաբացարկ հայտնել քվեարկությունից տասն օր առաջ: