«Ժողովուրդ» թերթը գրում է. «Հայաստանի Հանրապետության համար այսօր հիրավի պատմական օր է. Սերժ Սարգսյանը Մինսկում պետք է ստորագրի մի փաստաթուղթ, որը շատ քաղաքական գործիչներ բնորոշում են որպես ՀՀ անկախության սպառնալիք: Չի բացառվում նաև, որ դրանից հետո Հայաստանի և Արցախի սահմանների միջև մաքսակետ դրվի՝ անիմաստ դարձնելով բազմահազար մեր հայրենակիցների թափած արյունը: ՀՀ վարչապետ Հովիկ Աբրահամյանն էլ եռօրյա աշխատանքային այցով մեկնել է ԱՄՆ: Վաշինգտոնում նա կմասնակցի Համաշխարհային բանկի և արժույթի միջազգային հիմնադրամի տարեկան լրագումար նիստին: «Ժողովուրդ»-ը տեղեկացավ, որ Երևանի ժամանակով 01:30-ի սահմաններում ԱՄՆ հասած վարչապետին իր հայտնի ժպիտով դիմավորել է նախկին վարչապետը՝ ԱՄՆ-ում ՀՀ դեսպան Տիգրան Սարգսյանը: և մինչ ՀՀ իշխանության երկու թևերն արտերկրում են, ոչ իշխանական եռյակը Հայաստանում հուժկու հանրահավաք է հրավիրել: Սպասվում են ճռճռան ելույթներ՝ ընդհուպ մինչև անժամկետ նստացույցի մասին հայտարարություն: Ու քանի որ այսօր ՀՀ նախագահի լիազորությունները կատարում է ՀՀ ԱԺ նախագահ Գալուստ Սահակյանը, ուստի, կարծում ենք, ճիշտ պահն է, որ եռյակը բարձրացնի ամբողջական իշխանափոխության անհրաժեշտություն՝ պահանջելով ՀՀ փաստացի նախագահ Գալուստ Սահակյանի հրաժարականը. «Գալո՛ւստ, հեռացի՛ր»:
ՀՀ վարչապետ Հովիկ Աբրահամյանի գլխավորած պատվիրակությունը հոկտեմբերի 10-12-ը եռօրյա աշխատանքային այցով մեկնել է ԱՄՆ: Վաշինգտոնում վարչապետը կմասնակցի Համաշխարհային բանկի և Արժույթի միջազգային հիմնադրամի տարեկան լիագումար նիստին: Նախատեսված են երկկողմ հանդիպումներ Համաշխարհային բանկի, Արժույթի միջազգային հիմնադրամի և միջազգային ֆինանսական այլ կառույցների ղեկավարների հետ: Հովիկ Աբրահամյանի գլխավորած պատվիրակությունը ՀՀ դեսպանությունում կմասնակցի Հայաստանի անկախության տարեդարձին նվիրված ընդունելությանը: Վարչապետը կհանդիպի նաև հայ համայնքի ներկայացուցիչների հետ:
Մանրամասները՝ թերթի այսօրվա համարում
