Էստոնիայի կառավարությունը հասարակության ճնշման ներքո նախաձեռնել է փոփոխություն օրենսդրության մեջ, որպեսզի նորից արգելի հանրային վայրերում ալկոհոլային խմիչքներ խմելը: Այս մասին ուրբաթ օրը Postimees պարբերականին հայտնել է երկրի վարչապետ Թաավի Ռիյվասը:
Նա նշել է, որ հանրային քննարկումը, որն սկսվել է հանրային վայրերում ալկոհոլ խմելը թույլատրելուց հետո, հստակ ցույց է տվել, որ երկրի բնակիչները գոհ չեն օրենսդրության փոփոխությունից:
«Եթե հիմա ալկոհոլի գործածությունը հանրային վայրերում թույլատրված է ամենուր, սակայն տեղի իշխանություններն իրավունք ունեն գոտիներ ստեղծել, որտեղ ալկոհոլ խմելն արգելված է, ապա հիմա մենք նորից հանրային վայրերում ալկոհոլ խմելու ընդհանուր արգելք կդնենք՝ տեղի իշխանություններին իրավունք տալով գոտիներ սահմանել, որտեղ դա կթույլատրվի»,- ասել է Ռիյվասը:
Էստոնիայի խորհրդարանն այս տարվա հունիսին փոփոխություններ էր արել հասարակական կարգի պահպանության մասին օրենքում, որոնց համաձայն՝ հուլիսի 1-ից թույլատրվում է ալկոհոլ խմել հանրային վայրերում՝ որոշ բացառություններով:
