Հայտնի ֆրանսիացի դերասան Ժերար Դեպարդյեն դիտարկում է Ռուսաստանի, Մոնտենեգրոյի կամ Բելգիայի քաղաքացի դառնալու հնարավորությունը: Այս մասին մասին հայտնում է Le Monde թերթի կայքը:
Այն բանից հետո, երբ անցած հանգստյան օրերին Ֆրանսիայում հրապարակվեց Ժերար Դեպարդյեի նամակը վարչապետ Ժան-Մարկ Էյրոյին, որում նա հայտարարել էր Ֆրանսիայի քաղաքացիությունից հրաժարվելու մասին, նրա անձի շուրջ կրքերը նոր թափով սկսեցին եռալ: Պապարացիները հետևում են նրան ամեն քայլափոխի ՝ հուսալով որսալ այն պահը, երբ նա Փարիզից կտեղափոխվի վերջերս բելգիական Նեշեն քաղաքում գնված տուն:
Այսօր Դեպարդյեին նկատել են Փարիզի Շերշ-Միդի փողոցի Le bien decid ռեստորանում: Հանդիպման մասնակիցներից մեկը լրագրողներին ասել է, որ դերասանը կատակել է՝ ասելով, թե սոցիալիստ նախագահի ընտրության հաջորդ օրն ինքը փախուստի է դիմել երկրից: Նա ընդգծել է, որ դե ֆակտո արդեն կես տարի արտերկրում է բնակվում:
Դերասանը նաև ասել է, որ քաղաքացիություն ստանալու համար երեք երկիր է դիտարկում: Դրանք են Բելգիան, որտեղ նա անշարժ գույք է ձեռք բերել, Մոնտենեգրոն, որտեղ ունի ընկերներ և գործարար կապեր, և Ռուսաստանը:
Դերասանը հայտնել է, որ վերջին 45 տարիներին ինքը Ֆրանսիային 145 մլն եվրո հարկ է վճարել, և երբեք չի խուսափել պետության առջև իր պարտավորություններից: Նա առաջին մարդը չէ, որը փորձում է փախչել երկրից Ֆրանսուա Օլանդի իշխանության գալուց հետո: 2013-ին Ֆրանսիայի իշխանութունները մտադիր են հարուստների համար հարկ ներմուծել:
