Իտալիայի նախկին վարչապետը դժվար թե կարողանա հաջողությամբ վերադառնալ քաղաքականություն: Ինչպես հաղորդում է Interfax-ը, նման հայտարարությամբ հանդես է եկել Ֆրանսիայի նախագահ Ֆրանսուա Օլանդը:
«Ես կարծում եմ, որ Բեռլուսկոնին չունի քաղաքական լուրջ հեռանկարներ: Հավանաբար, նա ինքն էլ է գիտակցում, որ չի կարող հաջողության հասնել»,- հայտարարել է Օլանդը:
Ավելի վաղ ԵՄ գագաթնաժողովի ժամանակ Ֆրանսիայի նախագահն իր աջակցությունն էր հայտնել Իտալիայի կառավարության ներկա ղեկավար Մարիո Մոնտիին՝ անվանելով նրան «մարդ, որը թույլ տվեց Իտալիային ոտքի կանգնել»:
Օլանդի խոսքերով՝ Մոնտիի շնորհիվ Իտալիային սկսեցին հարգել:
ԵՄ գագաթնաժողովի մասնակիցները չեն թաքցնում, որ դրական են գնահատում Մոնտիի կատարած աշխատանքը: Եվրահանձնաժողովի նախագահ Ժոզե Մանուել Բարուզուն ոչ միայն դրական գնահատական է տվել Մոնտիի աշխատանքին, այլև կոչ է արել Բեռլուսկոնիին լավ մտածել՝ նախքան քաղաքականություն վերադառնալը: