ԵՄ գագաթնաժողովը հաստատել է եվրոպական Բանկային միություն ստեղծելու որոշումը: Այս մասին հաղորդում է ITAR-TASS-ը՝ վկայակոչելով ԵՄ խորհրդի նախագահ Հերման Վան Ռոմպեյի հայտարարությունը:
Վան Ռոմպեյը նշել է, որ եվրոպական Բանկային միություն ստեղծելու առաջին քայլը կլինի մինչև 2014թ. գարուն ԵՄ միասնական վերահսկիչ համակարգ ստեղծելը, որի մասին հինգշաբթի երեկոյան պայմանավորվածություն են ձեռք բերել ԵՄ անդամ երկրների ֆինանսների նախարարները:
Բանկային միության կառուցման երկրորդ քայլը կդառնա բանկերի ուղիղ ռեկապիտալիզացիայի համակարգ ստեղծելը, որը կարող է ապահովել բանկերի մասնակի կամ ամբողջական սնանկացումը առանց «դոմինոյի էֆեկտի» առաջացման վտանգի:
«Բանկային միության նպատակն է՝ ճեղքել արատավոր շրջանը բանկերի խնդիրների և հարկատուների գումարների միջև, որոնք պետությունները մինչև վերջին ժամանակներն օգտագործում էին իրենց խնդիրները լուծելու համար»,- ընդգծել է Հերման Վան Ռոմպեյը:
