Երբ քաղաքապետը կենդանի է, իսկ կենդանին՝ քաղաքապետ. «Հրապարակ»

«Հրապարակ» թերթը գրում է. «13.08.2014 – ԱՄՆ Մինեսոտա նահանգի Կորմորանտ քաղաքի բնակիչները համայնքի ղեկավար են ընտրել Դյուկ անունով յոթ տարեկան շանը: Ընտանի կենդանին ընտրություններում հաղթել է՝ զգալի առավելության հասնելով 12 տեղացիների նկատմամբ:

…28.09.2011 – Հոկտեմբերի 23-ին նշանակված Վառնայի քաղաքապետի ընտրություններում «Նոր Բուլղարիա միություն» կուսակցությունը, որպես իր պաշտոնական թեկնածու, առաջադրել էր Մարկո անունով էշին:

Շարքը կարելի է շարունակել: Բոլոր նման առաջադրումների դեպքում առաջադրողները «որոշում են կայացրել»՝ համարելով, որ նախկին և գործող քաղաքապետ-գյուղապետերը լավ չեն կատարում իրենց պարտականությունները, և պետք է այժմ էլ փորձել կենդանիների «դասից»:

Ամերիկյան Կորմորանտ քաղաքի բնակիչները, օրինակ, որոշել են, որ ղեկավարի պարտականությունները լավագույնս կարող է կատարել միայն շունը, քանի որ կենդանին ապահովում է իրենց անվտանգությունը, ինչը չէր անում քաղաքապետը: Շունը գոնե հաչում է և դրանով վանում գողերին կամ կծում քաղաքացիների վրա եկողներին: Նորընտիր քաղաքապետի աշխատավարձը կհատկացնի տեղի կենդանիների խանութը՝ նրան տալով շան կերի մեկ տարվա պաշար: Այլ բան պետք չէ: Ճիշտ է՝ շունը լրագրողներին չի մեկնաբանել ընտրություններում տարած հաղթանակը, սակայն բարեհամբույր նայել է տեսախցիկին: Հայաստանում, օրինակ, գրեթե մշտապես գյուղապետ-քաղաքապետերը խուսափում են տեսախցիկներից, փախչում, հայհոյում են կամ խաբում: Շունը գոնե բարեհամբույր նայել է:

4-ամյա Բոբին էլ, չնայած մանկապարտեզ է հաճախում, բայց տեղացիները մտածել են, որ անմեղ ու արդար երեխան ավելի լավ կարող է կառավարել: Բոբի Թաֆթսի պարտականությունների մեջ են մտնում երգեցողությունն ու պարերն իր համաքաղաքացիների հետ: Այսպես պետք է քաղաքի նախկին ու ապագա ղեկավարներին ցույց տալ, որ պետք է շփվել մարդկանց հետ, ոչ թե փակվել աշխատասենյակում ու մտածել միայն սեփական կարիքների մասին:

…Ուշագրավ բացատրություն կա և էշի պարագայում: «Նոր Բուլղարիա միություն» կուսակցության թեկնածու Մարկո էշի նախընտրական շտաբի ղեկավար, կուսակցության փոխնախագահ Անգել Դյանկովը նշել է, որ, ի տարբերություն այլ թեկնածուների, էշն ունի ուժեղ բնավորություն, չի գողանում, չի խաբում ու աշխատում է:

Հայաստանում այս պահին դեռևս միայն մարդիկ են ընտրվում քաղաքապետ, գյուղապետ, պատգամավոր կամ նշանակվում այլ պաշտոնների, բայց, ինչպես տեսնում ենք, այս բոլոր խնդիրներն առկա են նաև Հայաստանում, և չի բացառվում, որ եկող խորհրդարանական ընտրություններում առաջադրվի մեր հարևանի «Չուգուն» անունով ցուլը, «Մշտո» անունով աքլորը, շունը, այծը…

 

Մանրամասները՝ թերթի այսօրվա համարում