«Ես անլուրջ եմ համարում խորհրդարանական ուժերի ընդվզումը, որովհետև քաղաքական կուսակցությունը չի ընդվզում այն ժամանակ, երբ զգում է՝ թեժ աշուն է գալու, իրենք մշտապես պետք է ընդվզեն»,- «Առաջին լրատվական»-ի հետ զրույցում նման տեսակետ հայտնեց ազատամարտիկ Գագիկ Սարուխանյանը՝ անդրադառնալով քառյակի խոստացած թեժ աշնանը:
«Այսինքն՝ կարող է՝ միասին բորշչն եփեն, դուրս գան ու հայտարարեն, թե՝ տեսեք-տեսեք, մենք էլ ենք ընդդիմություն: Ընդդիմության ներկայացուցիչը,- դաշնակներին եմ ասում,- չի գնում և իշխող կառավարության տեսակետը որպես դեսպան այլ երկրում պաշտպանում»,- ասաց Սարուխանյանը:
Նրա դիտարկմամբ՝ այն ազատարամտիկները, ովքեր սատարում են քառյակին, միշտ էլ ակտիվացել են այն ժամանակ, երբ քառյակն է ակտիվանում․ «Ես չեմ ուզենա վատ նայել դրան, համենայնդեպս, ցանկացած ընդվզող խումբն էլ լավ է, այլ բան է, թե կա՞ արդյոք դրա հետևում ետին միտք, թե ինչու են հենց քառյակի ակտիվացման ժամանակ իրենք ակտիվանում: Չնայած մենք գիտենք, որ ժամանակին, երբ հանրահավաք արեց ՀԱԿ-ը, այդ ժամանակ ազատամարտիկների մի խումբ ասաց, որ միանում են այդ շարժմանը: Մենք դա չողջունեցինք, որովհետև ՀԱԿ-ի հետևում կանգնած են հին ՀՀՇ-ականները, լևոնականները, մտավախություն կա, որովհետև այն ժամանակվա վարչախմբի կողմից է աճեցված այսօրվա իրողությունը»:
Նա ընդգծեց, որ ՀԱԿ-ն էլ առաջարկում է հետևյալը՝ վատ է, մեզ վստահեք՝ լավ կլինի, բայց իրենք էլ արմատական փոփոխություններ չեն պատրաստվում անել․ «Նրանց, ովքեր գնում են իրենց հետևից, ես կորակեմ այդ մարդկանց կարճատեսներ։ Հիմնովին փոփոխությունների ձգտում է պետք ունենալ, ոչ թե այս խմբին մեկ ուրիշ խմբով փոխարինել»:
Սարուխանյանն անդրադարձավ նաև Լևոն Տեր-Պետրոսյանի այն հայտարարությանը, թե Մաքսային միությունն անշրջելի է, և պետք է գան իշխանության այն մարդիկ, ովքեր Հայաստանն այդ միությունում արժանապատվորեն կներկայացնեն․ «Ո՞ւմ հետ արժանապատվորեն ներկայանամ մի միությունում, որտեղ զենք են տալիս իմ թշնամուն, որ ինձ սպանի: Ես արժանապատվորեն գնամ մահանալո՞ւ: Ես ԱՄՆ ջատագովը չեմ, նա էլ թերություններ ունի, բայց հավատարիմ է մնում 907 բանաձին և Աֆղանստանից դուրս բերված հնամաշ ջիպերը չվաճառեց…»:
Ամբողջությամբ՝ մեր տեսանյութում։
