Երկու օր առաջ գլխին մահացու հրազենային վիրավորում ստացած 19-ամյա զինծառայող որդուն՝ Վլադիմիր Հայրապետյանին դիմավորելու փոխարեն մայրը նրա մահվան բոթն է ստացել: 14 ամիս զինվորական ծառայության մեջ գտնվող որդին արձակուրդ էր գալու:
Հենակետում էր, մահվանից երկու ժամ առաջ էր մայրը խոսել որդու հետ ու հիմա ցնցված է, շոկի մեջ, չի հավատում, որ որդուն այլևս չի տեսնելու, չի գրկելու ու կարոտը չի առնելու: «Ի՞նչ եմ անելու, ի՞նչ եմ անելու…», – forrights.am-ի փոխանցմամբ՝ շարունակ կրկնել է անօգնական ու շիվարած մայրը:
Նրանց բնակարանը ես գտա երեկ երեկոյան: Դուռը փակ էր: Մի պահ կասկածեցի, թե ճիշտ եմ եկել ու մեխանիկորեն սեղմեցի զանգը: Դուռը բացեց զինծառայողի երիտասարդ սևազգեստ մայրը՝ լացից կարմրած աչքերով: Աղքատ ու վերանորոգման կարիք ունեցող փոքրիկ բնակարանում մայր ու որդի մենակ էին իրենց վշտի հետ ու անպատկերացնելի իրական էր անսպասելի վրա հասած մահը:
Մահ, որ ներխուժել էր անասելի չքավոր այս ընտանիք: Մայրն ու ավագ որդին պատմել են, որ Վալոդիկի հետ խոսել էին, տրամադրությունը լավ էր, տուն էր գալու, ծառայության ընթացքում չի բողոքել ու ոչ մի կերպ չէին հասկանում, թե ինչ կարող էր տեղի ունեցած լինել:
Մայրը որդու գերազանց ծառայության համար ստացած պատվոգիրը ցույց է տվել ու նաև պաշտպանության նախարարության տված մի գրություն, որով երաշխավորում են, որ պատասխանատու են որդու կյանքի համար: «Վերջին 8-9 տարում մենակ եմ պահել, մեծացրել, բա սե՞նց են անում, էրեխուն սպանում՝ մոր ձեռքն են տալիս», – հարցնում էր մայրը՝ Սիրանույշը:
Թեև ամուսնուց բաժանված են, բայց հարաբերությունները խզված չեն, հայրը նույնպես մշտական կապի մեջ է եղել որդու հետ: Պատմեց, որ բազմիցս այցելել է Սիսիանի զորամասում ծառայության մեջ գտնվող որդուն, միշտ կապի մեջ են եղել, իր վերջին ունեցածով հնարավորինս հոգացել է որդու կարիքները:
Մանրամասները՝ forrights.am-ում