Facebook-ի ու Twitter-ի ավելի շատ ամերիկացի օգտատերեր են ստիպված ինքնագրաքննության ենթարկել իրենց արտահայտությունները սոցցանցերում այն բացահայտումներից հետո, որոնք արվել էին ԱՄՆ հատուկ ծառայությունների նախկին աշխատակից Էդվարդ Սնոուդենի կողմից: Այս մասին է վկայում հարցումը, որն անցկացրել է Pew հետազոտական կենտրոնը:
Համաձայն հետազոտության տվյալների՝ օգտատերերի շրջանում դիտվում է միտում՝ հրապարակավ չարտահայտելու իրենց քաղաքական հայացքները: Տվյալ երևույթին տրվել է «Լռության պարույր» (The spiral of silence) անվանումը:
Հարցման արդյունքով՝ հարցվածների 86 տոկոսը հայտարարել են, որ Էդվարդ Սնոուդենի գաղտնազերծումների առնչությամբ պատրաստ կլինեին շփվել ու արտահայտել իրենց կարծիքը ընտանիքի ու մտերիմների շրջանում: Սակայն իրենց դիրքորոշումը Facebook-ում արտահայտել համաձայնել է միայն 43%-ը, Twitter-ում՝ 41%-ը:
Հաշվետվության մեջ ասվում է, որ ամերիկացիները չեն հրապարակում իրենց հայացքները՝ մտավախություն ունենալով, որ ընկերներն ու գործընկերները չեն կիսի իրենց համոզմունքները:
Զեկույցի համահեղինակ, պրոֆեսոր Քիթ Հեմփթոնի կարծիքով՝ ինքնագրաքննության նման տեսակը լավ հետևանքների չի հանգեցնի:
