«Հուսով եմ, որ ԵԱՀԿ Մինսկի խումբը առաջ կտանի Սոչիի սեղանին դրվող առաջարկները»,- այսօր մի քանի լրատվամիջոցների հետ զրույցում ասաց Հայաստանում Մեծ Բրիտանիայի դեսպան Քեթրին Լիչը՝ պատասխանելով հարցին, թե ինչպե՞ս կվերաբերվի Մեծ Բրիտանիան, եթե Ռուսաստանը փորձի խաղաղապահներ տեղակայել ԼՂ հակամարտության գոտում: Նա նշեց, որ դա ավելի շուտ ԵԱՀԿ-ին վերաբերող հարց է, այս պահին այդ հարցն իրենց չի ուղղված, այլ Հայաստանին ու Ադրբեջանին:
«Առաջին լրատվական»-ի հարցին, թե արդյոք մտահոգ չէ՞, որ Սոչիի հանդիպումը անցկացվելու է առանց ԵԱՀԿ Մինսկի խմբի համանախագահների մասնակցության, և թվում է, որ Ռուսաստանը սկսում է միանձնյա կառավարել հակամարտությունը, պատասխանեց, որ ԵԱՀԿ Մինսկի խմբի ամերիկյան համանախագահ դեսպան Ուորլիքը ողջունեց հանդիպման առաջարկը, և հիմա ամենակարևորը հենց այդ հանդիպումն է, և մենք կսպասենք ու կտեսնենք, թե ինչ ելքեր կան հանդիպումից հետո: «Այնուհետև, հուսով եմ, որ ԵԱՀԿ Մինսկի խումբն առաջ կտանի սեղանին դրվող առաջարկները»,- նշեց Լիչը:
Դիտարկմանը, թե ինչո՞ւ միջազգային հանրությունը հասցեական մեղադրանքներ չի հնչեցնում, երբ Ալիևը սպառնում է պատերազմով, արձագանքեց՝ ասելով, որ միջազգային հանրության առաջնային նպատակն է իսկապես կենտրոնանալ հենց հանդիպման վրա և փորձել կոչ անել հանդիպման բոլոր կողմերին, որպեսզի նրանք առավելագույն ջանքեր գործադրեն լարվածությունը նվազեցնելու ուղղությամբ:
