Ադրբեջանական Turan լրատվական գործակալության փոխանցմամբ՝ 2012 թվականի դեկտեմբերի 1-ի դրությամբ Ադրբեջանի պետական նավթային ընկերությունը (SOCAR) Թուրքիայի Ջեյհան նավահանգստից արտահանել է 18.552.000 տոննա նավթ, որը Ջեյհան է հասցվել «Բաքու-Թբիլիսի-Ջեյհան» նավթամուղով: Դա 13.1 տոկոսով պակաս է 2011 թվականի նույն ժամանակահատվածի համեմատ: Այս մասին հայտնել է SOCAR-ի մամուլի ծառայությունը:
Արտաքին շուկաներ ադրբեջանական նավթի մատակարարման ծավալի նվազեցումը նշանակում է Ադրբեջանի նավթային եկամուտների նվազեցում: 1997 թվականից հետո առաջին անգամ է, որ Ադրբեջանում գրանցվել է նավթի արտահանումից ստացվող շահույթի նվազեցում:
Իսկ այս տարիներին շարունակ աճել է ադրբեջանական նավթի արտահանման ծավալը դեպի արտաքին շուկաներ, և հետևաբար` Ադրբեջանը տարեցտարի ավելի մեծ նավթային եկամուտներ է ստացել: 2011 թվականին Ադրբեջանի պետական նավթային հիմնադրամը «սև ոսկու» վաճառքից ստացել է մոտ 19.25 միլիարդ դոլար, իսկ այս տարվա առաջին 9 ամիսներին՝ 12.1 միլիարդ դոլար:
