Իրանական Press TV հեռուստաալիքի փոխանցմամբ՝ իրանցի մասնագետներն առաջընթաց են գրանցել հայրենական արտադրության հակահրթիռային պաշտպանության համակարգերի արտադրության հարցում։ Դրանք հանդիսանում են ռուսական «S-300» զենիթահրթիռային համալիրների համարժեքը: Այս մասին հայտարարել է Իրանի պաշտպանության նախարար Ահմադ Վահիդին.
«Հակաօդային պաշտպանության հայրենական համակարգերի մշակման գործընթացն ընթանում է ըստ պլանի: Թեև ավելի վաղ մենք հայտարարել էինք, որ համակարգի մի շարք կարևոր բաղադրատարրերի մշակումն անհնար է, այնուամենայնիվ, տվյալ ոլորտում գրանցվել է մեծ առաջընթաց»:
Դեռևս սեպտեմբերին իրանցի գեներալ Ֆարզադ Իսմայիլին հայտարարել էր, որ «Բավար 373» հակահրթիռային պաշտպանության հայրենական համակարգերի արտադրությունն ավարտված է 30 տոկոսով: Իրանում հուսով են, որ դրանք պատրաստ կլինեն մինչև ընթացիկ տարեվերջ (2013 թ. մարտի վերջը) կամ հաջորդ տարի:
Իրանի ու Ռուսաստանի միջև 2007 թ. կնքված պայմանագրով Ռուսաստանը պետք է Իրանին հատկացներ մի քանի «S-300» համալիր: Սակայն հետագայում Ռուսաստանը հրաժարվեց դրանից՝ դա պատճառաբանելով ՄԱԿ ԱԽ-ի պատժամիջոցներով: Դրանից հետո Իրանը որոշեց ստեղծել սեփական «S-300»-երը:
