ԱՄՆ Կալիֆոռնիա նահանգում երեք պատերազմների վետերան 97-ամյա Ջեյմս Ֆարելին վտարել են ծերանոցից, որովհետև նա կենվորներին և աշխատակիցներին խանգարել է իր երգով և հավայան կիթառ նվագելով: Այս մասին հայտնում է Huffington Post-ը:
«Ղեկավարությունը մշտապես ճնշել է իմ տաղանդը: Պատահել է, որ նրանք ինձ ընդհատել են ու ասել. «Հետ գնա քո սենյակ»: Երեխայի նման»,- վրդովմունք է հայտնել Ֆարելը, որը Երկրորդ աշխարհամարտի, Կորեայի և Վիետնամի պատերազմների մասնակից է:
Նրան նաև 1500 դոլարի հաշիվ են ներկայացրել նրա սենյակի պրոֆեսիոնալ մաքրման համար: Վճարելով հաշիվը՝ վետերանը մնացել է առանց խնայողությունների: Հաստատության ղեկավարությունը պնդում է, որ վետերանը մշտապես սուրճ ու ճաշ էր թափում գետնին, այդ պատճառով այն անհրաժեշտ է եղել շատ հաճախ մաքրել:
Այժմ վետերանին տանիք է տվել նրա խնդրին ծանոթ մի ընտանիք: Համացանցում վետերանի համար փող է հավաքվում. մոտ 1000 դոլար հավաքվել է: