ՀՀԿ գրասենյակի շենքի ճոխ վերանորոգումն ու նորակառույց հատվածի կառուցումը, պարզվում է, իրականացվել է ոչ թե ՀՀԿ մեծահարուստների, այլ Հայկական բարեգործական ընդհանուր միության միջոցներով, որը աշխարհի հայերից գումարներ է հավաքում` հայաստանցի կարիքավոր հայրենակիցներին այս կամ այն ծրագրով օգնելու համար:
«Մենք հողային տարածք ենք տվել: Մենք ունեինք բակային մաս, այդ բակային մասից որոշակի մաս տվել ենք բարեգործներին: Հիմնականում դա փոխհատուցում են վերանորոգման աշխատանքները կազմակերպելով: Մեր շենքի վերանորոգումը հիմնականում Հայկական բարեգործական ընդհանուր միությունն է արել, որը շինություն է կառուցում մեր շենքի հարևանությամբ»,- «Առաջին լրատվական»-ի հարցին ի պատասխան երեկ ասաց ՀՀԿ խմբակցության ղեկավար Գալուստ Սահակյանը:
Մեր դիտարկմանը, թե ինչո՞ւ ՀՀԿ-ն որոշեց բարեգործական միության հաշվին վերանորոգել իր շենքը, այն դեպքում, երբ իր շարքերում բազմաթիվ հարուստներ ունի, որ կարող էին այդ հարցը կազմակերպել, իսկ ՀԲԸՄ-ն աշխարհի հայերից գումարներ է հավաքում` այստեղ աղքատներին օգնելու համար, ՀՀԿ փոխնախագահը պատասխանեց. «Դա էդպես չի, որ աղքատներին է օգնում: Այդ հողը կուսակցության սեփականությունն էր, իհարկե շատ մեծ դժվարությամբ ենք տվել, որովհետև մեզ անհրաժեշտ տարածք էր դա: Եվ իրենք էլ շատ շնորհակալ են, որ համոզեցին, որ փոքր միջամտության արդյունքում տարածք հատկացնենք նաև իրենց»: