Ուզբեկստանի Տաշքենդի մարզի դատարանն օրերս կայացրեց երկրի նախագահ Իսլամ Քարիմովի դստեր՝ Գյուլնարա Քարիմովայի մերձավոր համախոհների դատավճիռը: Ըստ այդմ՝ Քարիմովայի քաղաքացիական ամուսինը՝ Ռուստամ Մադումարովն ու նրա վստահված անձը՝ հայազգի Գայանե Ավագյանը, դատապարտվեցին համապատասխանաբար՝ 10 և 9 տարվա ազատազրկման: Սակայն համաներման արդյունքում նրանց ժամկետները միանգամից կրճատվել են մեկ երրորդով: Ռուստամ Մադումարովը դատապարտվել է Ազգային անվտանգության ծառայության խմբի կազմում, որոնց մեղադրել են մարդկանց առևանգելու ու նյութական արժեքները երկրից դուրս բերելու մեջ:
Նիստերն անցկացվել են փակ:
Բացի այդ՝ Մադումարովը նաև անցել է մի քրեական գործով, որը հարուցվել էր Terra Group, Prime Media և Gamma Promotion ընկերությունների պաշտոնատար ղեկավարների դեմ: Ուզբեկստանի գլխավոր դատախազության տվյալներով՝ նրա հետ գործում ներգրավված են եղել Քարիմովայի վստահված անձ Գայանե Ավագյանն ու ոճաբան-խորհրդատու Եկատերինա Կլյուևան: Երեքն էլ կասկածվել են առանձնապես խոշոր չափերի հարկերից խուսափելու մեջ:
Ուզբեկաբնակ իրավապաշտպանների համոզմամբ՝ հանցավոր խումբը դատապարտվեց Ուզբեկստանում, որպեսզի Արևմուտքի ձեռքերը չհասնեն հանցավոր եռյակին, և նրանք չդատապարտվեն Արևմուտքում՝ մասնավորապես եվրոպական տարբեր երկրներում գումարների ապօրինի ձեռք բերման և օֆշորային ընկերությունների միջոցով դրանց լվացման համար:
Մեկ այլ վարկածի համաձայն՝ 2013թ.-ի աշնանը Գյուլնարա Քարիմովան, որը համարվում էր հոր իրավահաջորդը, հայտնվել է լուսանցքում. Ուզբեկստանում փակվեցին նրան պատկանող հեռուստառադիոընկերությունները, բուտիկները, ինչպես նաև հիմնադրամները: Նա նաև զրկվել է հոր իրավահաջորդի կարգավիճակից՝ Ֆրանսիայում, Շվեյցարիայում տարբեր ընկերությունների միջոցով փողերի լվացման ու հայտնաբերված աղմկահարույց խախտումների համար, քանի որ հայրը նրան չի տեսնում ապագա նախագահի դերում:
Հայազգի Գայանե Ավագյանը համարվում է ուզբեկական հայտնի կոռուպցիոն սկանդալի գլխավոր դերակատար, Ուզբեկստանի նախագահի դուստր Գյուլնարա Քարիմովայի աջ ձեռքը կամ աքիլլեսյան գարշապարը:
29-ամյա այս հայուհին, ով սերում է Տաշքենդից, իր համագործակցությունը Գյուլնարա Քարիմովայի հետ սկսել է դեռևս շատ երիտասարդ տարիքից՝ 18 տարեկանից: 2003թ. նա դարձել է Քարիմովայի «Նորաձևության տան» ղեկավարը: Հենց 2003թ.-ից էլ նրա ներկայությունը Քարիմովայի բիզնեսներում ավելի ու ավելի է մեծացել: Ըստ ուզբեկական լրատվամիջոցների՝ բացի Ջիբրալթարում գրանցված Takilant Limited ընկերության ղեկավարը լինելուց, նաև նաև ղեկավարում էր Panally LTD-ն՝ Լոնդոնում: 2005թ.-ից գործող Panally LTD-ն այս ողջ ընթացքում իր հաշվին կուտակել է 337 հազար ֆունտ, իսկ մյուս ընկերությունը, շվեդական լրագրողների հետաքննության արդյունքներով, շրջանառում էր ավելի լուրջ գումարներ:
Մինչև 2014թ. նա միայն մեծացրել է իր հանցավոր գործունեությունը ոչ միայն Ուզբեկստանում, այլև եվրոպական երկրներում:
2012 թվականին Գայանե Ավագյանի անունը զանգվածային լրատվամիջոցներում սկսեց հիշատակվել՝ կապված բազմամիլիոնանոց կաշառքների գործի հետ, որոնց փոխանցմանմեջ կասկածել են TeliaSonera շվեդա-ֆիննական հեռահաղորդակցական ընկերությանը: Ինչպես հաղորդվել է շվեդական մամուլում, փողերը փոխանցվել են Takilant Limited ընկերությանը, որը վերահսկում էր Ավագյանը:
Հայտնի է նաև, որ Ավագյանը ղեկավարում է Քարիմովայի հետ անմիջական առնչություն ունեցող օֆշորային մի շարք ընկերություններ: Ըստ ռուսական աղբյուրների՝ Ավագյանին է պատկանում նաև Coca Cola Uzbekistan ընկերության բաժնետոմսերի 49 տոկոսը։ Հայազգի այս հերոսուհու մասին անձնական այլ մանրամասներ հայտնի չեն:
