Facebook-ի ղեկավարությունը հերքել է սոցցանցում տարածված տեղեկություններն այն մասին, թե կայքի օգտագործման պայմաններում, որոնք վերաբերում են հրապարակվող նյութի և անձնական տվյալների նկատմամբ օգտատերերի հեղինակային իրավունքներին, վերջերս փոփոխություններ են մտցվել: Այս մասին գրում է Forbes-ը:
Զանգվածային հաղորդագրությունը, որը շատ օգտատերեր ակտիվորեն հրապարակում են որպես իրենց կարգավիճակ, գրված է պատասխանի տեսքով՝ իբր թե Facebook-ի առաջարկած նոր պայմանների դիմաց: Մասնավորապես, այնտեղ պարունակվում է կեղծ տեղեկություն այն մասին, որ Facebook-ը վերջերս փոփոխություններ է մտցրել օգտատիրական համաձայնագրի կետերում, որոնք վերաբերում են հեղինակային իրավունքներին:
Հաղորդագրության հեղինակները կոչ են անում օգտատերերին պատճենել այն իրենց էջերում՝ նշելով, որ դրանով իսկ օգտատերը կարող է անվտանգ դարձնել իր պրոֆիլի բովանդակությունը՝ կոմերցիոն նպատակներով օգտագործումից: Այն վարակի նման տարածվել է ողջ սոցցանցում:
