Լիբանանի Հանրապետության նախագահ Միշել Սուլեյմանի հրավերով ՀՀ նախագահ Սերժ Սարգսյանը պաշտոնական այցով նոյեմբերի 26-27-ը լինելու է Լիբանանում: Մի շարք պաշտոնական հանդիպումների թվում էր նաև նոյեմբերի 27-ին Սերժ Սարգսյանի հանդիպումը Լիբանանի խորհրդարանի ղեկավարի և պատգամավորների հետ: Սակայն երեկ խորհրդարանի նախագահ Նաբիհ Բերրին չեղյալ է համարել ուրբաթ օրը նախատեսված նիստը, որը պետք է տեղի ունենար Սերժ Սարգսյանի պատվին, և հստակեցրել, որ դրա փոխարեն կտրվի նախաճաշ: Նա օրակարգի այս փոփոխությունը պատճառաբանել է այն հանգամանքով, որ երկրի նախարարներից և պատգամավորներից շատերը Վատիկանում մասնակցելու են Լիբանանի օրվան՝ պատրիարք Բեշարա Ռայի կարդինալ նշանակելու պաշտոնական արարողությանը:
Ավելի վաղ Լիբանանի խորհրդարանի պատգամավոր, Բեյրութի Հնչակյան կուսակցության կենտրոնական վարչության փոխատենապետ Սեպուհ Կալպակյանը նշել էր, որ խորհրդարանը բաժանված է երկու ուժերի՝ «Մարտի 8» և «Մարտի 14» խմբակցությունների միջև: Նա ասել էր, որ Լիբանանում տեղի ունեցած վերջին իրադարձություններից հետո «Մարտի 14» ուժը ներկայացնող պատգամավորները, այդ թվում` նաև ինքը, բոյկոտում են ԱԺ նիստերը: «Հայ պատգամավորներից երկուսը «Մարտի 8» ուժի ներկայացուցիչներ են, իսկ չորսը՝ «Մարտի 14» խմբակցության անդամներ, ներառյալ` ես: Հետևաբար, եթե նախագահն այցելի խորհրդարան, մենք դժվարություն կունենանք այնտեղ լինելու»,- ասել էր Սեպուհ Կալպակյանը:
Այսօր նա «Առաջին լրատվական»-ի հետ զրույցում ասաց, որ խորհրդարանի նախագահը, հասկանալով, որ դահլիճում Սերժ Սարգսյանի ելույթին ներկա են լինելու 128 պատգամավորներից 30-35-ը, պատգամավորների մեկ երրորդը, նման հայտարարություն տարածեց: Սեպուհ Կալպակյանը դրական գնահատեց խորհրդարանի ղեկավարի նման որոշումն՝ ասելով, որ պատշաճ չէր լինի ներքաղաքական խնդիրների պատճառով ՀՀ նախագահին Լիբանանի խորհրդարանում նման ոչ պատշաճ և անհարգալից վերաբերմունք ցուցաբերել: «Անշուշտ, ճիշտ քայլ էր, որովհետև պետք եղած հարգանքը չէր մատուցվելու ՀՀ նախագահին: Կարծում եմ, որ սա ավելի դրական և ճիշտ քայլ էր և՛ ՀՀ նախագահի, և՛ խորհրդարանի նախագահի համար: Պարտադիր էլ չէր, որ երկիր այցելած նախագահը ելույթ ունենար խորհրդարանում»,- իր խոսքը եզրափակեց Սեպուհ Կալպակյանը:
Հիշեցնենք, որ Լիբանանում ներքաղաքական լարվածություն էր ստեղծվել հոկտեմբերի 19-ին Բեյրութի արևելյան հատվածում տեղի ունեցած պայթյունի հետևանքով, որի արդյունքում մահացել էր լիբանանյան հատուկ ծառայությունների բրիգադային գեներալ Վիսամ Ալ-Հասանը: Նրա մահը մեծացրել էր երկրում երկու հիմնական քաղաքական ուժերի՝ «Մարտի 8»–ի և «Մարտի 14»–ի միջև հակամարտությունը։ «Մարտի 14» ուժը ներկայացնող գործիչները մինչ այսօր պահանջում են Լիբանանի կառավարության հրաժարականը՝ բոյկոտելով նաև խորհրդարանի նիստերը:
