Грузия Online-ի փոխանցմամբ՝ Վրաստանի վարչապետ Բիձինա Իվանիշվիլին Թբիլիսիում լրագրողների հետ զրույցում հայտարարել է, որ պետք է վերականգնվի Վրաստանի տարածքային ամբողջականությունը, և որ Աբխազիան ու այսպես կոչված Հարավային Օսիան պետք է դառնան նրա մի մասը.
«Ներկա փուլում մենք չենք քննարկում տվյալ հարցերը: Մենք պետք է հարաբերություններ հաստատենք Սուխումի ու Ցխինվալի հետ՝ ցույց տալով, որ Վրաստանում իշխանության են եկել այլ անձինք, որոնք շահագրգռված են լավ հարաբերությունների հաստատմամբ: Դեռ խոսքը գնում է միայն հարաբերությունների հաստատման մասին:
Անջատողականները կարող են Վրաստանի նկատմամբ հետաքրքրություն ցուցաբերել միայն այն դեպքում, եթե վերջինս նրանց համար դառնա տնտեսական ու քաղաքական պլանում «հետաքրքիր»»:
Իվանիշվիլին նաև զուգահեռներ է անցկացրել Վրաստանի ու Ուկրաինայի միջև՝ ընդգծելով, որ Ուկրաինայում նախկին վարչապետ Յուլիա Տիմոշենկոյին ձերաբակալելը և եվրոպական ուղուց նահանջելը չեն համապատասխանում վրացական իրողությանը. «Այնտեղ Տիմոշենկոն իշխանություն չուներ և նրան ձերբակալեցին ինչ-որ համաձայնագրի կնքման համար:
Անձամբ ես չեմ ցանկանում Սաակաշվիլիի ձերբակալությունը, կարծում եմ, որ դա չի ցանկանում նաև հասարակությունը: Բայց եթե դատախազությունը կոնկրետ գործ հարուցի պետության բարձրաստիճան անձանց նկատմամբ, ես չեմ միջամտի և չեմ փակի այդ գործերը: Այդ դեպքում ինձ համար ավելի հեշտ է հրաժարական տալ, քան դատախազությունից պահանջել փակել տվյալ գործերը: Ես այդպիսի հարցերին չեմ միջամտում»:
Ինչ վերաբերում է Ռուսաստան մեկնելու հարցին, ապա Իվանիշվիլին հայտարարել է, որ չի պլանավորում այդպիսի այց իրականացնել այնպիսի պայմաններում, երբ Սուխումում ու Ցխինվալում գործում են այդ երկրի դեսպանատները: Նա չի բացառել, որ ռուսական ղեկավարության հետ կարող է հանդիպել Ռուսաստանի սահմաններից դուրս, օրինակ՝ Եվրոպայում:
Իվանիշվիլին հիշեցրել է, որ Վրաստանի կառավարությունում ստեղծվել է հատուկ պոստ՝ Ռուսաստանի հետ հարաբերությունների կարգավորման համար, և ներկայումս Ռուսաստանից սպասում է կոնկրետ քայլեր:
.
