«Ազատ դեմոկրատները» ողջունում են 100 տոկոս համամասնական ընտրակարգի և խորհրդարանական կառավարման համակարգի անցնելու ԲՀԿ–ի առաջարկը, բայց ունեն մտահոգություններ, որ դա կարող է «նախընտրական տեխնոլոգիա» լինել, մանավանդ որ՝ դա նորություն էր ԲՀԿ-ի համար: Այս մասին «Արմնյուզ» հեռուստաընկերության «Բանաձև» հաղորդման եթերում ասել է «Ազատ դեմոկրատներ» կուսակցության փոխնախագահ Ալեքսանդր Արզումանյանը: Երկու ուժերի հանդիպումից պարզվել է, որ կան մոտեցումների ընդհանրություններ, որոնք հույս են ներշնչում բանակցությունների շարունակման ուղղությամբ: Իսկ վաղը «Ազատ դեմոկրատները» կհանդիպեն ՀՅԴ-ի հետ: «Լայն ֆորմատով գնում է ընդդիմադիր դաշտի օրակարգի համախմբում»,- ասել է Ալեքսանդր Արզումանյանը՝ միակ հարցը համարելով այն, թե ԲՀԿ-ն որքանով է տեղավորվում այդ ընդդիմադիր դաշտում:
Անդրադառնալով ՀՅԴ-ի ներկայացրած 7 կետանոց օրակարգին՝ Ալեքսանդր Արզումանյանն ասել է, որ դրանց մի մասը կարելի է առանց քննարկելու ընդունել: «Մամուլից դատելով՝ «Ժառանգությունը» նույնպես մասնակցում է կոնսուլտացիաներին, կողմ է, և «Ժառագության» ծրագրում էլ է եղել դրույթ, որ կառավարման համակարգը պետք է փոխվի: Ավելին, Րաֆֆի Հովհաննիսյանն ասաց, թե մեկ ժամկետով է ընտրվում, և դա, ենթադրվում է, որ պետք է օգտագործվի այդ փոփոխություններին անցնլու համար»,- ասել է «Ազատ դեմոկրատների» ներկայացուցիչը՝ հավելելով, որ Ր. Հովհաննիսյանը նախընտրում է լինել նախագահի միասնական թեկնածուն:
«Ամենադժվարը ԲՀԿ-ի հետ համագործակցության եզր գտնելն է, քանի որ ԲՀԿ-ն ունի պատասխանատվության մաս այն ամենի համար, որ կատարվել է՝ ընդհուպ մինչև Մարտի 1–ը»,- ասել է Ալեքսանդր Արզումանյանը՝ հավելելով, որ ԲՀԿ-ն ինքը պետք է պատասխանները գտնի:
Անդրադառնալով նախագահի իրենց թեկնածուի վերաբերյալ լուրերին՝ Արզումանյանն ասել է. «Մենք նախագահի հարցը չէինք քննարկում այնքան ժամանակ, մինչև որ հստակ դարձավ, որ չենք պաշտպանելու Րաֆֆի Հովհաննիսյանի թեկնածությունը: Մեր սատարումից ինքը՝ Ր. Հովհաննիսյանը հրաժարվեց»: Բանախոսը նշել է, որ իրենք կարող են լինել ՀՀ–ում առաջին կին թեկնածուն առաջադրող կուսակցությունը: Ինչ վերաբերում է միասնական թեկնածուին, նա ասել է, որ դաշտը չի կարելի սահանափակել ՀԱԿ-ով ու ԲՀԿ-ով. նախագահի միասնական թեկնածուն պարտադիր չէ, որ լինի այդ ուժերից:
Ալեքսանդր Արզումանյանը կասկած է հայտնել, որ Լևոն Տեր-Պետրոսյանը կառաջադրվի: «Տեր-Պետրոսյանն ունի լռության երկարամյա փորձ: Իմ խորին համոզմամբ՝ նա չի դնելու թեկնածությունը: Դրանով եմ պայմանավորում լռությունը: Կարծում եմ, որ իր մակարդակի քաղաքական գործիչը շատ էլ լավ պատկերացնում է՝ ինչ է կատարվում: Չեմ պատկերացնում, որ, լինելով պատմաբան, ունենալով նախորդի փորձը, կասկածի տակ դնի նախագահ ընտրված լինելու պարագան և գնա արկածախնդրության»:
Խոսելով ՀԱԿ-ի մասին՝ «Ազատ դեմոկրատների» փոխնախագահը նշել է, որ ՀԱԿ-ում որոշումները չեն կայացվել ժողովրդավար ձևերով, և դա է պատճառը, որ ներքին որոշ ուժեր լքել են ՀԱԿ-ը: «Միակ բանը, որ պահպանում է ՀԱԿ-ը, որպես կառույց, Լևոն Տեր-Պետրոսյանի անձն է ու հեղինակությունը: Եթե նա չի դնում թեկնածությունը, շատ դժվար է պատկերացնել ՀԱԿ-ին որպես միասնական թիմ»:
Ինչ վերաբերում է «Ժառանգության» հետ հարաբերություններին, Ալեքսանդր Արզումանյանն ասել է, որ ֆրակցիայի որոշումների կայացմանն «Ազատ դեմոկրատները» չեն մասնակցում, բայց հարաբերությունների վերջնական ճշգրտում չկա:
