Ֆրանսիան Հայաստանի և Ադրբեջանի նախագահների փարիզյան հանդիպմամբ ձգտում է ԼՂ հակամարտությունում առաջխաղացում գրանցել: «Առաջին լրատվական»-ի հետ զրույցում այս մասին ասաց Հայաստանում Ֆրանսիայի արտակարգ և լիազոր դեսպան Անրի Ռենոն՝ անդրադառնալով Հայաստանի և Ադրբեջանի նախագահների հնարավոր փարիզյան հանդիպմանը:
Նա նշեց, որ ժամանակը հասունացել է, որպեսզի բանակցված լուծում գտնվի բավականին երկար ժամանակ ընթացող Լեռնային Ղարաբաղի հակամարտությանը: Ուստի, ըստ դեսպանի, որպես ԵԱՀԿ Մինսկի խմբի համանախագահող երկիր, բնականաբար, Ֆրանսիան չի կարող անմասն մնալ այդ հակամարտությանը ուշադրություն հատկացնելու անհրաժեշտությունից և, բնականաբար, ջանք չի խնայում և չի խնայելու, որպեսզի իր գործուն մասնակցությամբ հնարավորինս դյուրին դարձնի այս հակամարտության կարգավորման գործընթացը:
«Այս առնչությամբ Հայաստան կատարած պետական այցի ընթացքում Ֆրանսիայի Հանրապետության նախագահը հստակ հայտնեց հայաստանցի գործընկերոջը իր տրամադրվածության մասին՝ իր հարկի տակ կազմակերպել երկու երկրների նախագահների հանդիպում: Ի դեպ, նա նմանատիպ առաջարկով հանդես էր եկել նաև մինչև Երևան ժամանելը՝ Բաքվում այցի ժամանակ:
Նպատակն այն է, որ երկխոսությունը դյուրին դարձնելով՝ հնարավոր ցանկացած միջոց գործադրվի՝ գործընթացն ավելի առաջ շարժելու համար, և հենց այդ ոգով է, որ այսօր շարունակվում են շփումները Ֆրանսիայի և հակամարտող կողմերի միջև»,- ասաց դեսպանը:
Հարցին՝ ե՞րբ է նախատեսվում նախագահների հանդիպումը Փարիզում, դեսպանը պատասխանեց՝ կարևորն այն է, որ երկխոսությունն արդեն ծավալվել է:
«Նմանատիպ նրբերանգներ ունեցող թեման արժե չհրապարակել ու պահպանել գաղտնիություն: Համեստ լռությունն այս դեպքում ավելի գնահատված է: Ես ուզում եմ հիշատակել՝ սա այն հարցն է, որի նկատմամբ ամենայն աչալրջությամբ Ֆրանսիան հետևում է՝ հաշվի առնելով խնդիրների բարդությունը»,- ասաց դեսպանը:
Հիշեցնենք, որ Ադրբեջանում ԱՄՆ դեսպան Ռիչարդ Մորնինգսթարը հայտարարել էր, որ Ադրբեջանի և Հայաստանի նախագահները կհանդիպեն Փարիզում։ Նա ևս հանդիպման ժամկետ չէր նշել։
«ԱՄՆ-ը կարծում է, որ Հայաստանի և Ադրբեջանի նախագահները փարիզյան հանդիպման ընթացքում կոնկրետ համաձայնության կգան ԼՂ հակամարտության կարգավորման հարցում»,- ասել էր դեսպանը։
