ԱՄՆ 40-րդ նախագահ Ռոնալդ Ռեյգանի այրին՝ Նենսի Ռեյգանը, թղթակիցներին հուզել է պատմությամբ, որ մինչ օրս զգում է իր ամուսնու ներկայությունը և նրան տեսնում է իր երազներում: 92-ամյա նախկին առաջին տիկինը Ռեյգանի մահվան տասներորդ տարելիցի առթիվ ծաղիկներ է դրել նրա գերեզմանին, հայտնում է NY Daily News-ը:
Ռոնալդ Ռեյգանը մահացել է 93 տարեկանում 2004 թվականին Ալցգեյմերի հիվանդության դեմ 10 տարվա պայքարից հետո, գրում է Fox News-ը: Նա ԱՄՆ նախագահ է եղել 1981-1989 թթ.:
Նենսի Ռեյգանը, որը մեկ ամսից կդառնա 93 տարեկան, հիշատակի արարողությանը ներկա է եղել հաշմանդամի սայլակի վրա: 2 տարի առաջ նա ընկել ու կոտրել է կողոսկրերն ու այդ ժամանակից ի վեր նրա առողջությունն առանձնապես փխրուն է:
«Ինձ համար իսկապես դժվար է հավատալ, որ Ռոննին արդեն 10 տարի է՝ չկա: Ես մինչև հիմա զգում եմ նրա ներկայությունն ամեն օր, և նա հաճախ գալիս է իմ երազներում»,- ասել է տիկին Ռեյգանը:
Նա պատմել է, որ շատերն ասում են, որ կուզենային «նոր Ռոնալդ Ռեյգանի տեսնել»: «Բայց ինձ համար միշտ մեկ Ռոնալդ Ռեյգան կլինի, մարդ, որը եղել է իմ ամբողջ կյանքի սերը և մեծագույն ղեկավարներից մեկը, որոնց երբևէ տեսել է այս երկիրը»,- ասել է Նենսի Ռեյգանը:
Նենսի և Ռոնալդ Ռեյգանները 2 երեխա ունեն: Աղջիկը՝ Պատրիսիա Աննան, առավել հայտնի է Փեթի Դևիս բեմական անունով: Որդու անունը Ռոնալդ Փրեսքոթ Ռեյգան է:
