«Ժողովուրդ» օրաթերթը գրում է. «Մայիսի 25-ին կայացած Ուկրաինայի նախագահական ընտրություններում հաղթեց միլիարդատեր Պյոտր Պորոշենկոն, ում բիզնես ակտիվների թվում են «Roshen» հրուշակեղենի ընկերությունը, «5 ՍՈվՈս» հեռուստատեսությունը, ավտոմեքենաների, ավտոբուսների գործարաններ և այլն: Այս իրողությունը տարօրինակ է այնքանով, որ Ուկրաինայի նախկին նախագահ Վ. Յանուկովիչին քննադատող ընդդիմության հիմնական մեխը, մինչ Մայդանի հայտնի իրադարձությունները, այն էր, որ վերջինս խոշոր օլիգարխ է, կոռումպացված է և այլն: Պարզվում է՝ նախագահ լինելու համար օլիգարխ լինելը պարտադիր է, բայց հարց է՝ ում օլիգարխը` Արևմուտքի՞, թե՞ Ռուսաստանի:
Նկատենք, որ դեպի Եվրամիություն ձգտող Վրաստանում նույնպես հաղթեց միլիարդատեր Բիձինա Իվանիշվիլիի կուսակցությունը: Եվ բնական էր, որ Պորոշենկոյին Արևմուտքն իր աջակցությունը պետք է հայտներ` ընդունելով ընտրության արդյունքները: Ռուսաստանի Դաշնության արտգործնախարար Ս. Լավրովն էլ երեկ հայտարարեց, որ Մոսկվան պատրաստ է երկխոսել Ուկրաինայի ընտրված նախագահ Պյոտր Պորոշենկոյի հետ: Իսկ Հայաստանի Հանրապետությունը դեռ որևէ դիրքորոշում չի հայտնել:
Ի դեպ, ուշագրավ է, որ Ուկրաինայի նորընտիր նախագահ Պորոշենկոյի՝ «Roshen» տեսակի կոնֆետների ներմուծողը և նրա բիզնես գործընկերը ՀՀ ֆինանսների նախարար Գագիկ Խաչատրյանն է: Ավելի ճիշտ՝ նրա հարազատները:
Մանրամասները՝ թերթի այսօրվա համարում: