Հանրապետական կուսակցությունը նախօրեին գործկոմի նիստ է անցկացրել, որից հետո ՀՀԿ խոսնակ Էդուարդ Շարմազանովը հայտարարել է, թե ԲՀԿ-ի խորհրդարանական կառավարման մոդելի վերաբերյալ իրենց դիրքորոշումը ինքը արտահայտել է նախօրեին տարածած իր հայտարարության մեջ: Այսինքն՝ ՀՀԿ-ն ևս մեկ անգամ, արդեն՝ Սերժ Սարգսյանի «ներգրավվածությամբ» հայտարարել է, որ ԲՀԿ-ի հետևում կանգնած է Ռոբերտ Քոչարյանը:
Միևնույն ժամանակ, Հայ ազգային կոնգրեսը նախօրեին հանդես է եկել հայտարարությամբ, որտեղ մի քանի պայման է առաջ քաշել «Բարգավաճ Հայաստան»-ի հետ բանակցությունների համար՝ մատնանշելով բանակցություններում անմիջականորեն առաջիկա նախագահական ընտրություններին վերաբերող օրակարգային հարցերի քննարկման անհրաժեշտությունը: Այսինքն՝ Կոնգրեսը ԲՀԿ-ին փորձում է թույլ չտալ շեղվել նախագահական ընտրություններից և դրա համար օգտագործել խորհրդարանական կառավարման մոդելի օրակարգը: Այլ կերպ ասած՝ Կոնգրեսը, ըստ էության, իր տարածած հայտարարության մեջ վկայում է, որ ԲՀԿ-ն պարզապես գցել է իրեն կամ փորձում է գցել, և այս իսկ պատճառով ԲՀԿ-ի ուշադրությունն է փորձում հրավիրել նախագահական ընտրությունների վրա: Պարզ չէ, թե ինչ կանի Կոնգրեսը, եթե ԲՀԿ-ն որոշի մերժել նրա առաջարկած բանակցությունների օրակարգը` պնդելով միայն խորհրդարանական կառավարման վրա:
ՀՀԿ խոսնակ Շարմազանովը հայտարարել է, որ ՀԱԿ-ը կարճատև նախագիծ է, այսինքն՝ սրանով ՀՀԿ-ն, ըստ էության, ցույց է տալիս ՀԱԿ-ին, որ ամենևին մտադիր չէ նրան ԲՀԿ-ից կտրելու համար ինչ-որ բան առաջարկել: Այս պայմաններում ԲՀԿ-ն ամենևին շահագրգռված չի լինի ընդունել Կոնգրեսի առաջարկած օրակարգը կամ բանակցության ընթացքում այդ օրակարգային կետերից որևէ մեկով զիջել Կոնգրեսին, որովհետև ՀՀԿ-ն ԲՀԿ-ին ուղակի ակնարկում է, որ նպատակ չունի Հայ ազգային կոնգրեսին տանել նրա մոտից: Հակառակը, ըստ ամենայնի՝ ՀՀԿ-ն խրախուսում է ԲՀԿ-ին իր թևի տակ հավաքել հնարավորինս շատ, այսպես ասած, ընդդիմադիր ուժերի՝ նրանց կենտրոնացնելով մի տեղ:
Բանն այն է, որ այդ ուժերը ԲՀԿ-ի գործնական, իրական պոտենցիալի վրա շատ քիչ ազդեցություն ունեն, և դրանցով ԲՀԿ-ի նոմինալ փոխարժեքը ամենևին չի բարձրանում, ռեալ ուժն ամենևին չի ավելանում: Այսինքն՝ ՀՀԿ-ի համար ԲՀԿ-ն մնում է այնպես, ինչպես կա, և խնդիրը ԲՀԿ-ին չեզոքացնելու կամ զսպելու առումով մնում է նույնը: Իսկ ահա երբ «Բարգավաճ Հայաստանը» իր շուրջն է նաև կարողանում հավաքել այլ ուժերի, օրինակ՝ ՀՅԴ, ՀԱԿ, «Ժառանգություն» և այլ մանր-մունր միավորներ, այդ դեպքում, լուծելով ԲՀԿ-ի հարցը, Սերժ Սարգսյանը կկարողանա միանգամից լուծել նաև այդ ուժերի հարցը՝ մի զարկով խփելով մի քանի նապաստակ:
Այսինքն՝ երբ ԲՀԿ-ի շուրջը կոնսոլիդացիա է տեղի ունենում, Սերժ Սարգսյանը, ըստ էության, ոչինչ չի կորցնում, և այդ իսկ պատճառով նա, ըստ ամենայնի, լրջորեն չի խանգարի այդ կոնսոլիդացիային և թույլ կտա, որ բոլորը հավաքվեն ԲՀԿ-ի շուրջը՝ ակամայից ծառայելով հենց իր շահերին:
