Այսօր մի խումբ երիտասարդներ հայտարարեցին «Առաքելություն» կուսակցության հիմնադրման նախաձեռնող խմբի ստեղծման մասին: Լրագրողների հետ հանդիպմանը նախաձեռնող խմբի անդամները հանդես եկան հայտարարությամբ, որով իրենց մտահոգությունն էին հայտնում երկրում ստեղծված իրավիճակի վերաբերյալ:
«Սահմանադրության և տարրական իրավունքների ոտնահարումը, ժողովրդավարության ամենօրյա խեղաթյուրումը, անպատժելիությունն ու քաղաքացու իրազեկվածության բացակայությունն այլևս լուրջ սպառնալիք են դարձել երրորդ հանրապետության գոյաբանությանը: Հայաստանը կանգնած է արտագաղթի և դեմոգրաֆիական աղետի վտանգի առաջ, սոցիալ-տնտեսական ծայրահեղ վիճակը վտանգում է հասարակ մարդու գոյությունը»,- հայտարարեցին նրանք:
Երիտասարդները նշեցին, որ հասունացել է հասարակական-քաղաքական գործունեություն ծավալելու և հասարակությանը վերը նշված խնդիրների լուծման նպատակով համախմբելու պահը: Նախաձեռնող խումբն առաջիկայում հանդես կգա հրապարակային գործունեությամբ, կհանդիպի բնակչության հետ, այցելություններ կկատարի մարզեր, կստեղծի տարածքային կառույցներ, կհրավիրի համագումար:
Պատասխանելով լրագրողների հարցերին` նախաձեռնության անդամներն ընդգծեցին, որ քաղաքական դաշտն այս փուլում գնում է դեպի դեգրադացիա, այդ պատճառով էլ իրենք որոշել են հենց այս փուլում համախմբվել: Երիտասարդները հերքեցին այն տեղեկությունը, թե իրենց նախաձեռնության ստեղծումը կապված է նախագահական ընտրությունների հետ: Նրանք նշում են, որ իրենց համախմբել է երկրում փոփոխություններ կատարելու պատասխանատվությունը:
Նախաձեռնության անդամները հայտարարեցին, որ նախագահական ընտրություններում սեփական թեկնածու չեն ունենալու, իսկ թեկնածուների գրանցումից հետո կհայտնեն իրենց դիրքորոշման մասին: Նախագահական ընտրությունների նախաշեմին երկրում ստեղծված իրավիճակը «Առաքելություն» կուսակցության անդամները անհասկանալի են համարում` նշելով, որ ընտրություններին մնացել է երեք ամիս, իսկ հանրությունը չգիտի, թե որ թեկնածուների միջև է ընտրություն կատարելու:
Ի դեպ, «Առաքելության» նախաձեռնող խմբի անդամներից մեկը` Մանուկ Սուքիասյանը, նախկինում ՀԱԿ անդամ էր: Նա նշեց, որ այսօր կապ չունի ՀԱԿ-ի հետ: Նախաձեռնող խմբի մյուս անդամներն են Ազատ Թովմասյանը, Գարեգին Մուրադյանը, Էդուարդ Տերտերյանը, Հակոբ Մանուկյանը, Հրաչյա Սարգսյանը, Մարինե Եփրեմյանը, Մեսրոպ Առաքելյանն ու Վահե Հովհաննիսյանը:
