Մոտ երկու տասնյակ ակտիվիստ բնապահպաններ բարձրացել են Մեծ Բրիտանիայի գազի խողովակների վրա՝ կառավարությանը կոչ անելով հրաժարվել էլեկտրաէներգետիկայում գազի օգտագործումից և անցնել էներգիայի վերականգնվող աղբյուրներին։ Այս մասին հաղորդում է բնապահպանական No dash for gas ընկերությունը:
«Հոկտեմբերի 29-ին վաղ առավոտյան 17 երիտասարդ ակտիվիստներ Արևելյան Բերտոնում բարձրացել են մոտ 80 մետր բարձրություն ունեցող գազի նոր էլեկտրակայանի վրա` պահանջելով դադարեցնել այդ կայանի աշխատանքը և ապագայում դադարեցնել նման կայանների շինարարությունը»,- նշվում է հաղորդագրության մեջ:
Արևելյան Բերտոնի կայանը գազային 20 նոր էլեկտրակայաններից մեկն է, որոնք Մեծ Բրիտանիայի կառավարությունը պատրաստվում է մոտ ժամանակներում ստեղծել:
Ակտիվիստների կարծիքով՝ գազի կայանները ստեղծում են «թանկ ու կեղտոտ» էլեկտրաէներգիա, և կառավարությունը չպետք է ավելացնի դրանց թիվը, այլ ներդրումներ անի այն կայաններում, որոնք օգտագործում են էներգիայի այլընտրանքային աղբյուր` քամի, ջուր, արև: Բացի այդ, այլընտրանքային էներգետիկան, «կանաչների» կարծիքով, կօգնի նոր աշխատատեղեր ստեղծել և նվազեցնել էլեկտրաէներգիայի գինը:
