Թուրքական Ankara լրատվական գործակալության փոխանցմամբ՝ Սիրիայի փոխարտգործնախարար Ֆայսալ Միկդադը հանդիպել է երկրում գտնվող իրանական Fars լրատվական գործակալության գլխավոր տնօրեն Սեյիդ Նիզամեդդին Մուսեվիի հետ: Հանդիպման ժամանակ կողմերը նշել են, որ Սիրիան և Իրանն ունեն ընդհանուր ու ռազմավարական նպատակներ:
Նրանք ընդգծել են, որ տարիներ առաջ իր դիմադրողական դիրքորոշման պատճառով Իրանը ենթարկվեց Իրաքի հարձակմանը, իսկ դա կազմակերպած երկրներն այս անգամ էլ դուրս են եկել Սիրիայի դեմ, քանի որ Սիրիան դիմակայում է Իսրայելին:
Միկդադն իր հերթին սուր քննադատության է ենթարկել Թուրքիային՝ ընդգծելով, որ այդ երկիրն աջակցում է «Ալ Քաիդա» ահաբեկչական կազմակերպությանը: Նա հիշեցրել է թուրքական մամուլի այն հրապարակումը, թե Թուրքիային անհրաժեշտ է ընդգրկել ահաբեկչությանն աջակցող երկրների թվում, քանի որ Անկարայի ղեկավարությունն աջակցում է ահաբեկիչներին:
