Новости-Грузия-ի փոխանցմամբ՝ Վրաստանի պաշտպանության նախկին նախարար Դմիտրի Շաշկինը Facebook-ի իր էջում կտրուկ հերքել է մի շարք ԶԼՄ-ների կողմից շրջանառության մեջ դրված այն տեղեկատվությունը, թե ապօրինաբար որպես նվեր հազարավոր ինքնաձիգներ է բաժանել պաշտպանության նախարարությունում.
«Այդ պնդումները մաքուր կեղծիք են: Վրաստանի օրենսդրության համաձայն՝ պաշտպանության նախարարն օրինական իրավունք ունի նախարարության աշխատակիցներին պարգևատրել ծառայողական-հաստիքային զենքով: Երբ ես պաշտպանության նախարար էի, ես միայն մեկ անգամ եմ օգտվել այդ իրավունքից:
Ես պաշտպանության նախարարության 45 աշխատակիցների որպես նվեր հատկացրել եմ ոչ ավտոմատ զենք: Որպես նվեր զենքի հանձնման կանոնն ամրագրված է Վրաստանի նախագահի՝ 2003 թվականի թիվ 430 հրամանով»:
Նշվում է, որ սա Շաշկինի երկրորդ նամակն է Վրաստանը լքելուց հետո: Հոկտեմբերի սկզբին՝ խորհրդարանական ընտրությունների անցկացումից քիչ անց, Շաշկինը գործուղման է մեկնել ԱՄՆ, որտեղից պետք է վերադառնար հոկտեմբերի 6-ին, սակայն, ինչպես պարզվեց ավելի ուշ, նա արձակուրդ է վերցրել:
