Իսպանիայի կառավարությունը թույլ չի տա թագավորության նավահանգիստներ մտնել այն նավերին, որոնք զենք են տեղափոխոմ Իսրայել։ Այս մասին հայտարարել է Իսպանիայի արտգործնախարար Խոսե Մանուել Ալբարեսը TVE հեռուստաընկերությանը տված հարցազրույցում։
Նա հաստատել է, որ Մադրիդն արդեն մերժել է մեկ նավի մուտքը:
«Մենք չենք ցանկանում նպաստել պատերազմին։ Մենք ցանկանում ենք մշտական և անհապաղ հրադադար, ինչպես նաև բոլոր պատանդների ազատ արձակում և հումանիտար օգնության անհապաղ ստացում… Մերձավոր Արևելքն ավելի շատ զենքի կարիք չունի», – Ալբարեսի խոսքերն է մեջբերում ՏԱՍՍ-ը:
«Մենք թույլ չենք տա մուտք գործել (խմբ․՝ Իսպանիայի նավահանգիստներ), եթե նավն Իսրայել է ուղևորվում զենքով», – հավելել է ԱԳ նախարարը:
Փետրվարին ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելը հայտարարել էր, որ Իսրայելին աջակցող երկրների իշխանությունները պետք է այլևս նրան չխնդրեն խուսափել Գազայի հատվածում քաղաքացիական զոհերից։ Բորելի խոսքով՝ նրանք պետք է իրենք սկսեն գործել, օրինակ՝ սահմանափակեն զենքի մատակարարումները։
Իսպանիայի կառավարությունը վստահեցրել է, որ 2023 թվականի հոկտեմբերին Մերձավոր Արևելքում իրադրության սրման պահից ի վեր Իսրայել զենքի արտահանման նոր լիցենզիաներ չի տրամադրել և մտադիր չէ դա անել, մինչև իրադրությունը չկարգավորվի:
