Քրդական Firat լրատվական գործակալությունը հաղորդում է, որ Գերմանիայի արտգործնախարար Գիդո Վեստերվելլեն իր համերկրացիների ուշադրությունն է հրավիրել Թուրքիայի արևելյան և հարավ-արևելյան քրդաբնակ նահանգներում տիրող քաղաքական անկայունության վրա` ընդգծելով, որ վերջին շրջանում հաճախացել են օտարազգի զբոսաշրջիկների վրա կատարված հարձակումները.
«2010 թվականի մայիսից շարունակվող բախումներում զոհվել է ավելի քան 40 զինծառայող, բացի այդ, անցյալ տարի Ստամբուլի Թաքսիմ հրապարակում իրականացվեց խոշոր ահաբեկչություն: Այժմ նույնպես հավանականություն կա, որ Թուրքիայի արևելյան և հարավարևելյան նահանգներում բախումներ կսկսվեն Քրդստանի աշխատավորական կուսակցության (PKK) զինյալների և թուրքական բանակի միջև: Վտանգ կա նաև, որ Թուրքիայի քաղաքներում շրջիկ խմբերը կարող են ահաբեկչական գործողություններ իրականացնել»:
Հիշեցնենք, որ 2010 թվականի հոկտեմբերին Թուրքիայի մշակույթի և զբոսաշրջության նախարար Էրթուղրուլ Գյունայը հայտնեց, որ իրենց հաշվարկներով` 2011 թվականին Թուրքիա կայցելի 30 միլիոն զբոսաշրջիկ, որոնք 25 միլիարդ դոլարի եկամուտ կապահովեն երկրին: Գյունայի խոսքերով` իրենք բավարարված չեն դրանով, և իրենց նպատակը շարունակում է մնալ 30 միլիարդ դոլարը: Տարեկան Թուրքիա է այցելում մոտ 5 միլիոն գերմանացի զբոսաշրջիկ:
