Ադրբեջանցի փորձագետ Ռասիմ Մուսաբեկովը վրացական ПИК հեռուստաընկերության եթերում հայտարարել է, որ Կովկասում առկա է պատերազմների վերսկսման սպառնալիք, իսկ դրանց կարգավորման գործընթացները հայտնվել են փակուղում:
«Չնայած այսօր չենք կարող ասել, որ կա խաղաղություն, գոնե պատերազմ էլ չկա: Միևնույն ժամանակ դա նորմալ իրադրություն չէ, երբ տարածաշրջանը ճակատային գծերով է գծված, և մարդիկ ռազմական գործողությունների վերսկսման սպառնալիքի պայմաններում են ապրում»,- ասել է Մուսաբեկովը:
Ղարաբաղյան հակամարտության կարգավորման գործընթացի մասին նա կարծիք է հայտնել, որ գործընթացը փակուղում է, և անհայտ է` ինչպես դուրս գալ այդ իրավիճակից: «Դրա համար համանախագահները պետք է փոխզիջումներ ստիպեն, իսկ կողմերին մնում է իրար վախեցնել»,- ասել է փորձագետը:
Շեշտելով, որ Ադրբեջանի ռազմական բյուջեն ավելի մեծ է քան Ուկրաինայի պես պետության համանման ծախսերը, Մուսաբեկովն ասել է, որ դա ինչ-որ պահի կարող է ուժի կիրառման արդյունավետության վստահություն կամ վստահության պատրանք ստեղծել:
