Կիրակիի լույս երկուշաբթիի գիշերը Բաղդադում հատուկ գործողությունների արդյունքում ազատ են արձակվել պատանդներ, որոնց ուժով կաթոլիկ եկեղեցում էին պահում Ալ-Ղաիդայի գրոհայինները: Իրաքի իշխանությունների փոխանցած տվյալներով, զոհվել է 52 պատանդ, մի քանի տասնյակ մարդ վիրավոր է:
Միջադեպը տեղի է ունեցել կիրակի օրը Իրաքի մայրաքաղաքի կենտրոնում: Ալ-Ղաիդայի հետ կապեր ունեցող «Իսլամական պետություն Իրաքում» կազմակերպության անդամները գրեթե 100 հոգի պատանդ են վերցրել եւ թաքնվել եկեղեցում: Պատանդների թվում եղել են կանայք, երեխաներ եւ ծերեր:
Պատանդներին ազատագրելու առաջին փորձն անհաջող է եղել, քանի որ հաջողվել է ազատել միայն 19 հոգու: Երկրորդ փուլում կիրառվել են նաեւ ամերիկյան եւ իրաքյան ուղղաթիռներ, հատուկ ջոկատներ, ինչի արդյունքում բոլոր 5 գրոհայինները սպանվել են: Զոհվել են նաեւ 2 ոստիկան, 7 հատուկջոկատային եւ 2 պահապան:
Իրաքի իրավապահ մարմիններից հայտնել են, որ գրոհը կազմակերպել է Ալ-Ղաիդան: Իրականացվում է հետաքննություն:
Այս մասին փոխանցում է Newru.com կայքը:
