«2011 թվականը Հայաստանի համար երկրորդ հետճգնաժամային շրջան էր, որի ընթացքում կառավարության գլխավոր խնդիրը մակրոտնտեսական կայունության ապահովումն էր: Տարին կարելի է համարել հաջող. մենք ունեցանք բավական բարձր՝ 4.6 տոկոս տնտեսական աճ»,- «Հ2» հեռուստաընկերության «Խոսքի իրավունք» հաղորդաշարի այսօրվա թողարկմանը 2011թ. Պետբյուջեի կատարման մասին խոսելիս ասել է ԱԺ ֆինանսավարկային և բյուջետային հանձնաժողովի ՀՀԿ-ական նախագահ Գագիկ Մինասյանը:
Գագիկ Մինասյանը տնտեսական առաջընթացի ապահովման կարևոր բաղադրիչ է համարել արդյունաբերությունն ու գյուղատնտեսությունը: Իսկ շինարարության ոլորտը, որը տարիներ շարունակ ապահովում էր մեր տնտեսության աճը, պատգամավորի խոսքերով՝ պետք է անկում ապրեր, քանի որ արտահանման ուղղություն չէր. «Այս տարի արդյունաբերությունն ու գյուղատնտեսությունը ևս աճել են, շինարարությունը կրկին անկում է արձանագրել, նախորդ տարի 12 տոկոս էր, այս տարի 4 տոկոս է:
Չնայած տարին սկսվեց բավականին բարձր գնաճով, սակայն, պատգամավորի խոսքերով՝ տարվա ընթացքում հաջողվեց զսպել՝ տարին ամփոփելով 4,7 տոկոս գնաճով: Ընթացիկ տարվա 9 ամիսներին գնաճը 2 տոկոս է, ինչը Գագիկ Մինասյանը համարում է ցածր: Իսկ եկող տարվա համար կանխատեսում է 4 տոկոս:
Հանրապետական պատգամավորը գովաբանել է նաև արտահանման-ներմուծման ցուցանիշները. «2011թ. արտահանման տեմպերը 2.5 անգամ գերազանցեցին ներմուծման տեմպերին: Այս տարա ցուցանիշները ևս կարևոր են. մենք ունենք 11 տոկոսի արտահանման աճ, 4 տոկոս՝ ներմուծման աճ:
Անդրադառնալով արտաքին պարտքի ցուցանիշներին, ԱԺ ֆինանսավարկային և բյուջետային հանձնաժողովի նախագահը նշել է, որ կառավարությունը ճգնաժամային տարում պարտքեր վերցնելու շնորհիվ որևէ սոցիալական ծրագիր չի կրճատել. «Վեցնելով վարկերը՝ առաջինը ֆինանսավորեցինք տնտեսությունը: Մեր պարտքերը բոլոր ցուցանիշներով կառավարելի են. այդ պարտքերը աշխատել են տնտեսության համար, ստեղծվել են աշխատատեղեր, բերել են հարկեր և լուծվել են խնդիրները»:
Հարկային ու մաքսային համակարգերի մասին խոսելիս էլ պատգամավորը նշել է, որ բարեփոխումները թեև նկատելի են, սակայն չեն բավարարում:
Հիշեցնենք, որ 6 դեմ, 70 կողմ ձայների հարաբերակցությամբ խորհրդարանն այսօր ընդունել է 2011թ. Պետբյուջեի կատարողականը:
