Վերջին շաբաթների ընթացքում շատ լրատվամիջոցներ հայտնում էին, որ քաղցկեղով տառապող` Apple ընկերության հիմնադիր Սթիվ Ջոբսի վիճակը բավականին ծանր է: Նույնիսկ կանխատեսումներ կային, որ նրան ընդամենը մի քանի շաբաթ է մնացել ապրելու:
Սակայն երեկ նա անձամբ է ներկայացրել աշխարհում շատ հայտնի iPad պլանշետային համակարգչի երկրորդ տարբերակը. «Մենք շատ երկար ենք աշխատել այս սարքի վրա, այդ պատճառով ես չէի կարող բաց թողնել այս պահը»,- ասել է Սթիվ Ջոբսը: Այս մասին հաղորդում է BBC հեռուստաալիքը:
Պլանշետային այս նոր համակարգչի առանձնահատկությունները կայանում են նրանում, որ ավելի հզորացվել է պրոցեսորը, ունի տեսախցիկներ թե՛ դիմացից և թե՛ հետի մասում, բարելավվել է գրաֆիկան: Բացի այդ, համակարգիչն ավելի բարակ է, քան իր նախորդը, պակասեցվել է քաշը, ինչպես նաև այն այսուհետ թողարկվելու է նաև սպիտակ գույնով: Ամենաէժան տարբերակը կարժենա 499 դոլար, իսկ վաճառքը կսկսվի 2011թ. մարտի 11-ից` ԱՄՆ-ում, իսկ Եվրոպայում` մարտի 25-ից:
