Այսօր ՀՀ ԱԻ նախարարությունում տեղի է ունեցել հերթական ամենշաբաթյա խորհրդակցությունը, որը վարել է նախարար Արմեն Երիցյանը։
ԱԻՆ լրատվական ծառայությունից «Առաջին լրատվական»-ին հայտնում են, որ ընդհանուր առմամբ դրական գնահատելով անցած շաբաթվա ԱԻՆ աշխատանքը` նախարարը նշել է, որ անելիքներ դեռ շատ կան։ Մասնավորապես` անհրաժեշտ է ձեռք բերել ուղղաթիռով գետից ջուր վերցնելու 5 տոննանոց սարքավորում, արագ վերանորոգել ու տեխնիկապես հագեցնել Գառնիի դիտարանը, ԱԻՆ տարածքում կառուցել միջազգային չափանիշներին համապատասխանող դայվինգի կենտրոն` ջրասուզակների մարզումների համար։
Նախարարության նորակառույց բազմահարկ մասնաշենքի բացումը տեղի կունենա այս տարվա նոյեմբերի կեսին, հաշվարկներ են արվել մյուս մասնաշենքերի ամրացման և վերակառուցման վերաբերյալ։ ԱԻ նախարարությունը շուտով կստանա «ԶԻԼ 131» և «ԳԱԶ 66» մակնիշների 10 ամենագնաց արտաճանապարհային ավտոմեքենա և շարժական 4 էլեկտրակայան։
Խորհրդակցությանը ՍՊԱԾ գործակալության պետ Հ. Պետրոսյանը հայտնել է, որ օրերս Ատոմային էներգետիկայի միջազգային գործակալությունը (ՄԱԳԱՏԷ) հավանություն է տվել իրենց կողմից ներկայացված ծրագրին, ըստ որի 6 անգլիական արտադրության նորագույն թվային սեյսմիկ կայաններ կտեղադրվեն մայրաքաղաքի և ՀԱԷԿ-ի միջև ընկած տարածքում։ Բացի այդ, շուտով մեր ֆրանսիացի գործընկերների աջակցությամբ ևս 6 նոր սեյսմիկ կայանների տեղադրման ուղղությամբ կսկսվեն նախապատրաստական աշխատանքներ։ Դրանցից երկուսը կտեղադրվեն ՀՀ հարավային հատվածում, որտեղ դիտակայանների թիվը համեմատաբար քիչ է, երեքը` հանրապետության կենտրոնական մասում, մեկն էլ` հյուսիս-արևմուտքում` Բավրայի մոտ։ Նախարար Ա. Երիցյանն ընդգծել է, որ սեյսմիկ պաշտպանությունը նախարարության գերակա ուղղություններից է, և հանձնարարել մշտապես ուշադրության կենտրոնում պահել բնակչության իրազեկման խնդիրները` կանխելու անհարկի խուճապը։
Առաջիկայում տեսախցիկներ կտեղադրվեն նախարարության առանձնացված ստորաբաժանումներում և դժվարմատչելի մարզային կայաններում` օպերատիվ կերպով տեղեկատվություն ստանալու և աշխատանքի արդյունավետությունը բարձրացնելու համար։ Մի քանի օրվա ընթացքում ինտերնետ կապով ապահոված կլինեն հանրապետության բոլոր հրշեջ մասերը։
Օրերս ԱԻՆ համաբուժարանը ձեռք է բերել սարքավորումներ` աչքի կաբինետի և լաբորատորիայի համար։ Գնահատելով արված աշխատանքը` ՀՀ ԱԻ նախարարը Փրկարար ծառայության բժշկական ապահովման վարչության պետ, փոխգնդապետ Կարեն Աթոյանին շնորհեց գնդապետի կոչում։
