Ինչպես նշվում է ամերիկյան գաղտնի նամակագրության մեջ, որը հրապարակվել է Wikileaks կայքի կողմից, Եգիպտոսի ամենամեծ ընդդիմադիր ուժը՝ «Մուսուլման եղբայրները», որի ներկայացուցիչները ժամանակ առ ժամանակ հայտնել են տարբեր ծայրահեղական կազմակերպություններին իրենց աջակցության մասին, միևնույն ժամանակ սերտ կապեր են ունեցել (հավանաբար՝ նաև ունեն) Իրանի հոգևոր ղեկավարության հետ:
Փաստաթուղթը ներկայացնում է ԱՄՆ կենտրոնական հրամանատարության ղեկավար գեներալ Պետրեուսի և Եգիպտոսի հետախուզության ղեկավար Օմար Սուլեյմանի հանդիպումը, որը տեղի է ունեցել 2010 թ. հունիսի 29-ին: Սուլեյմանը պատմել է Իրանի կողմից եկող կոնկրետ վտանգի մասին:
«Եգիպտոսը տուժում է նրանց (իրանցիների.– 1in.am) արբանյակների` «Համասի» և «Հիզբոլլահի» միջամտություններից, ինչպես նաև «Մուսուլման եղբայրներին» նրանց ցուցաբերած օգնությունից: Մենք կարող ենք միայն հույս ունենալ, որ Իրանը կդադարեցնի այդ աջակցությունը»,- ասել է Օմար Սուլեյմանը:
Մեկ այլ փաստաթղթում էլ Աբու Դաբիի թագաժառանգ, արքայազն Մուհամադ բեն Զայադ Ալ-Նահիան զգուշացրել է ամերիկյան փորձագետներին, որոնք մասնագիտացած են ահաբեկչության դեմ պայքարում, որ «վտանգված են ընտրություններն այն երկրներում, որտեղ «Մուսուլման եղբայրներ» կազմակերպությունը ունի լավ զարգացած ենթակառուցվածքներ»:
