Թեև պետական գնումների ոլորտում առկա են որոշակի բարեփոխումներ, այնուամենայնիվ` Վերահսկիչ պալատի ստուգումների արդյունքում բացահայտվել են հակամրցակցային, ոչ թափանցիկ և խտրական հիմքերով կազմակերպված գնման գործընթացներ: Այսօր՝ սեպտեմբերի 11-ին, ՀՀ Ազգային ժողովում կայացած քննարկումների ժամանակ այս մասին հայտարարեց ՀՀ Վերահսկիչ պալատի նախագահ Իշխան Զաքարյանը՝ ներկայացնելով 2011թ. Վերահսկիչ պալատի հաշվետվությունը:
Մասնավորապես՝ գները որոշվում են ոչ շուկայական մեթոդներով և փաստացի «շեղվում» են շուկայական գներից: «Գնումների գործընթացի մասնակիցները գալիս են հակամրցակցային համաձայնության, մրցույթներն անցկացվում են ձևականորեն, մրցույթների մասնակիցները հիմնականում հանդիսանում են միջնորդներ, ինչը հանգեցնում է գների թանկացման»,- նշեց նա:
Ըստ ՎՊ հաշվետվության՝ ՀՀ կառավարությանն առընթեր անշարժ գույքի կադաստրի պետական կոմիտեի «Ճամբարակ» և «Ամասիա» տարածքային ստորաբաժանումների համար 2008 և 2011 թվականներին 14,7 մլն դրամ ընդհանուր գումարով ձեռք բերված վարչական տարածքներն առ այսօր չեն օգտագործվում: Նշված ստորաբաժանումներն իրենց գործունեությունն իրականացնում են նախապես վարձակալած տարածքներում` վճարելով տարեկան 151.5 հազար դրամ վարձավճար: Նույնիսկ վարձակալած տարածքներում կատարել են վերանորոգման աշխատանքներ:
Իսկ ահա Արարատի մարզի Հովտաշատ համայնքի ճանապարհների ասֆալտապատման աշխատանքները կատարվել են անորակ, ինչի արդյունքում շուրջ վեց ամիս անց ճանապարհը քայքայվել է և երթևեկության համար դարձել գրեթե անպիտան: Ծախսված գումարը, փաստորեն անարդյունավետ է ծախսվել:
