Ադրբեջանական Turan լրատվական գործակալության փոխանցմամբ՝ ԵԽԽՎ ղեկավար Ժան Կլոդ Մինյոնը հայտարարություն է տարածել, որում նշել է` մտահոգված է Ռամիլ Սաֆարովին ներում շնորհելուց հետո Հայաստանի ու Ադրբեջանի միջև հարաբերությունների լուրջ վատթարացման կապակցությամբ:
Մինյոնն ընդգծել է, որ միանում է միջազգային քննադատությանը, քանի որ Ադրբեջանում հերոսացրել են սարսափելի հանցագործություն կատարած Սաֆարովին, ով դրա համար դատապարտվել է Եվրոպայի խորհրդի երկրի դատարանի կողմից:
Մինյոնը վստահություն է հայտնել, որ Սաֆարովին ազատելն անընդունելի է, և որ այդ սկանդալային ազատումը շատ բացասական հետևանքներ է առաջացրել առանց այն էլ լարված հայ-ադրբեջանական հարաբերություններում: Մինյոնի կարծիքով՝ ստեղծված իրավիճակը տանում է դեպի տարածաշրջանային իրավիճակի քննադատություն:
Մինյոնն Ադրբեջանի իշխանություններին կոչ է արել վերանայել սեփական դիրքորոշումը՝ համապատասխանեցնելով Եվրոպայի խորհրդի չափորոշիչներին: