«Իմ հասցեին հնչում են հայտարարություններ, թե ընդհատել եմ դատավարությունը, խոսում են նաև այն մասին, թե գնացել եմ արտերկիր: Հիմա հայտարարում եմ՝ դատավարությունը չեմ ընդհատել, իսկ արտերկիր գնալս կապված է եղել գիտական աշխատանքի հետ, սակայն մտադիր չեմ այնտեղ հաստատվել»,- այսօր լրագրողների հետ հանդիպմանը ասաց ԵՊԼՀ նախկին ռեկտոր Սուրեն Զոլյանը:
Անդրադառնալով դատավարությանը` նա ասաց, որ այն ընթանում է ձգձգումներով: Վերջին նիստը տեղի է ունեցել հուլիսի 18-ին, իսկ հաջորդը տեղի կունենա վաղը՝ օգոստոսի 30-ին: Ըստ Զոլյանի` վաղը Աշոտյանի խոսելու հերթն է: Վաղը պիտի նա ապացուցի, թե ինչ իրավունքով է ստուգումներ անցկացրել համալսարանում և ինչ խախտումներ է հայտնաբերել, որի հիման վրա իրեն ազատել են աշխատանքից. «Վաղը կհամոզվենք՝ Աշոտյանը պետական ա՞յր է, ինչպես ինքն է ասում, թե՞ մանր խաբեբա»:
Բանախոսը նշեց նաև, որ երեք ամսով մեկնելու է Տալլինի համալսարան՝ գիտական աշխատանքով զբաղվելու, որից հետո անպայման կվերադառնա Հայաստան. «Նշեմ նաև, որ Հայաստանից որևէ առաջարկություն չեմ ստացել, աշխատանքի բոլոր հրավերներս եղել են եվրոպական բուհերից. երևի պրն Աշոտյանին հաճոյանալու համար չեն հրավիրում այստեղից»:
