Մեխիկոյում մի քանի հազար մարդ դուրս է եկել բողոքի ակցիայի՝ արգելափակելով երկրի ամենահայտնի հեռուստաալիքի՝ Televisia-ի շենքը, հաղորդում է Reuters-ը: Հավաքվելով ստուդիայի առաջ՝ ցուցարարները հրաժարվել են ներս թողնել լրագրողներին:
Ակցիայի մասնակիցները լրագրողներին մեղադրում են նախագահական ընտրությունների կողմնակալ մեկնաբանության մեջ և պնդում, որ հեռուստաալիքը բացահայտ աջակցել է նախագահ ընտրված ընդդիմադիր Ինստիտուցիոն-հեղափոխական կուսակցության թեկնածու Էնրիկե Պենիա Նիետոյին: Ցույցին մասնակցում են ուսանողներ և արհմիությունների աշխատակիցներ: Ակնկալվում է, որ հեռուստաալիքի արգելափակումը կշարունակվի մեկ օր:
Հեռուստաալիքի ղեկավարությունը պնդում է, որ Televisia-ն ազնիվ կերպով լուսաբանել է ընտրությունները և փրայմ-թայմերի եթերների ժամանակ պատմել բոլոր թեկնածուների գործունեության մասին:
Ձախ ուժերի պարտված թեկնածու Անդրես Մանուել Լոպես Օբրադորը Էնրիկե Պենիա Նիետոյին մեղադրել է հեռուստաալիքին լրացուցիչ եթերի համար վճարելու մեջ: Բացի այդ, Օբրադորը գործող նախագահին մեղադրել է ընտրողների 5 մլն ձայն գնելու մեջ:
Մեքսիկայում նախագահական ընտրությունները տեղի են ունեցել հուլիսի 1-ին: Պենիա Նիետոն ստացել է ընտրողների ձայների 38 տոկոսը՝ իր մրցակցին շրջանցելով մոտ 7 տոկոսով: Նոր նախագահի անունը պաշտոնապես կհայտարարվի սեպտեմբերին, իսկ մինչ այդ դատարանը կքննի Նիետոյի դեմ ներկայացված մեղադրանքները:
