«Եթե դու Հայաստանում գների աճը բացատրում ես միջազգային շուկաներում գնաճով, ապա ինչու ես բարձրացնում վերաֆինանսավորման տոկոսադրույքը և ինչպես ես գնողունակ պահանջարկի նվազեցման միջոցով գնաճի դեմ պայքարում»,- այսօր լրագրողների հետ հանդիպման ժամանակ նման հարադրում արեց ԱԺ ՀՅԴ խմբակցության պատգամավոր Արա Նռանյանը:
Նրա խոսքով` որքան էլ որ Հյաստանում պահանջարկը նվազեցվի, միևնույն է` եթե գնաճը միջազգային շուկաներում է տեղի ունենում, այդ ապրանքների գները Հյաստանում չեն կարող նվազել: Այդ պատճառով թանկ փողի քաղաքականությունը, որ այսօր վարում է մեր ԿԲ-ն, ըստ պատգամավորի, անհիմն է:
Հարցին, թե հնարավո՞ր է արդյոք սոցիալական բում Հայաստանում, Ա. Նռանյանը պատասխանեց, որ այսօր մեր կառավարությունը համառորեն գնում է սոցիալական դժգոհության ալիքը բարձրացնելու ճանապարհով: Եվ եթե մեր քաղաքացիները հավատան, որ իրենք կարող են ինչ-որ բան փոխել այս երկրում, ապա շատ կարճ ժամանակում, ըստ պատգամավորի, Հայաստանում լուրջ փոփոխություններ կլինեն:
