ИТАР-ТАСС-ի փոխանցմամբ՝ Վաշինգտոնն ավելի շատ է ներգրաված Սիրիայի շուրջ իրավիճակի զարգացման մեջ, քան դա կարող եր թվալ նախկինում: Ամերիկյան The Wall Street Journal-ը (WSJ) գրել է, որ վերջին ժամանակներս ԱՄՆ պետդեպարտամենտի և Կենտրոնական հետախուզական վարչության (ԿՀՎ) ջանքերն ուղղված են եղել նրան, որ խոչընդոտեն Սիրիային իրանական զենքի մատակարարումներին և հակակառավարական ուժերի հետ կապեր հաստատելուն:
Հոդվածի հեղինակներն ընդգծում են, որ տվյալ գործողություններն իրականացվել են ոչ պաշտոնապես և լայն հնչեղություն չեն ստանում: Հենվելով ԱՄՆ կառավարությունում ունեցած մի շարք աղբյուրների վրա՝ նրանք նշում են, որ այս տարի ամերիկացի դիվանագետները փորձել են ճնշում գործադրել Իրաքի կառավարության վրա, որպեսզի այդ երկիրն իր օդային տարածքը փակի այն ինքնաթիռների առջև, որոնցով հետախուզական տվյալների համաձայն՝ Իրանը զենք է մատակարարում Ասադին հավատարիմ բանակային ստորաբաժանումներին: Բացի այդ՝ փորձեր են ձեռնարկվել՝ խոչընդոտելու Իրանից Սուեզի ջրանցքով ռազմական բեռների փոխադրմանը:
Ամերիկյան հետախուզությունում առկա աղբյուրը լրագրողներին հայտնել է, որ Վաշինգտոնը վերսկսել է ջանքեր գործադրել Ասադի ռեժիմի վրա բոլոր հնարավոր ուղղություններով ճնշում գործադրելու համար: Նա հավելել է, որ ԿՀՎ-ն Սիրիայի վերաբերյալ հետախուզական տվյալներ է փոխանակում Թուրքիայի ու Հորդանանի հատուկ ծառայությունների հետ: ԱՄՆ-ը մի շարք տվյալներ փոխանցում է նաև Սիրիայում գործող ռեժիմի հակառակորդ ապստամբներին:
