iPhone 4S սմարթֆոնի համար նախատեսված հավելվածի՝ Siri ձայնային օգնականի նոր գովազդում նկարահանվել է ռեժիսոր Մարտին Սկորսեզեն: Այս մասին հաղորդում է Apple Insider-ը: Այն հայտնի մարդկանց մասնակցությամբ դարձել է 4-րդը՝ Apple ընկերության գովազդային հոլովակների շարքում:
Հոլովակում Սկորսեզեն տաքսիով անցնում է Մանհեթենով և հայտնվում խցանման մեջ: Նա սկսում է իր աշխատանքային գրաֆիկը ծրագրել Siri-ի միջոցով: Հոլովակի վերջում Siri-ն նրան ցույց է տալիս ճանապարհների խցանումները, ինչից հետո Սկորսեզեն տաքսիստներին ցույց է տալիս ազատ ճանապարհներն ու շնորհակալություն հայտնում ձայնային օգնականին:
Siri-ի նախորդ հոլովակներում նկարահանվել են Զոի Դեշանելը, Սեմյուել Լ. Ջեքսոնը և Ջոն Մալկովիչը: Հոլովակներից յուրաքանչյուրը կոչված է ընդգծելու Siri-ով շփման ժամանակ ամերիկացի դերասանների անհատականությունը:
iPhone 4S-ը իր ձայնային օգնականով հանդերձ` ներկայացվել է 2011-ի հոկտեմբերին: Siri-ի առաջին գովազդային հոլովակը թողարկվել է նույն թվականի նոյեմբերին: Նրանում հայտնի մարդիկ նկարահանված չեն եղել, այլ պարզապես հոլովակում խոսվել է ծառայության հնարավորությունների մասին:
