Երևանի քաղաքապետ Տիգրան Ավինյանը տեսանյութ է հրապարակել՝ այն հղելով «իրենց չսիրող մարդկանց»։
«Հունիսի 7-ին մեզ մնացել է մի քանի օր։ Վստահորեն, մեր ժողովրդի գերակշիռ մեծամասնությունն արդեն իսկ կողմնորոշվել է, թե ինչպիսի ընտրություն է կատարելու։ Խոսքս հղում եմ այն մարդկանց, ովքեր մեզ չեն ընտրելու։ Կլինեն պատճառներ՝ մեզ չսիրելու և չընտրելու, սակայն կոչ և հորդոր ունեմ։
Մի՛ ընտրեք այնպիսի ուժերի, որոնք ծառայում են այլ երկրների, գործում են այլ երկրների հատուկ ծառայությունների ցուցումներով, որովհետև չեն ներկայացնում մեր երկրի և ձեր շահերը։ Մի՛ ընտրեք այնպիսի ուժերի, որոնք համատարած ընտրակաշառք են բաժանում, նրանք ուզում են վերականգնել մի իրավիճակ, որում իրենք տերն էին, ժողովուրդը՝ իրենց ծառան։
2018 թվականին մենք այդ տխմար համակարգը բոլորս միասին մերժել ենք, և դուք չեք ուզում նման համակարգի վերականգնում։ Վստահ եմ՝ կգտնեք այնպիսի ուժեր, որոնք ծառայում են ՀՀ-ին, ընտրակաշառք չեն բաժանում, չեն կեղտոտվել նմանատիպ պրոցեսներով, այնուամենայնիվ ցանկանում են փոփոխություններ տեսնել, որոնք մենք չենք կարողանում բերել։
Բոլորիս մաղթում եմ ժողովրդավարական, ազատ և անկախ ընտրություններ, իսկ ընտրակաշառք բաժանող և այլ երկրներին ծառայող սրիկաներին շուտափույթ քաղաքական մահ»,- ասել է քաղաքապետը։
