«Վանո Սիրադեղյանը հենց այնպես Հայաստան չի գա, եթե նրա վերադարձի համար չստեղծվեն բարենպաստ պայմաններ»,- այսօր լրագրողների հետ հանդիպմանն ասաց Վանո Սիրադեղյանի նախկին թիկնազորի պետ Սուրեն Սիրունյանը: Ըստ նրա՝ Հայաստանի ցանկացած քաղաքացի պետք է ունենա իրավունք՝ ապրելու իր երկրում, պետք է մեր դատարանները գործեն այնպես, որ քաղաքացին ստանալով իր պատիժը՝ գոհ մնա արդարադատությունից:
«Մթնոլորտը լավն է, բայց դա կապ չունի դատական համակարգի հետ: Եթե 2000-2008 թվականներին ուրիշ հասարակական մթնոլորտ էր, ապա 2008 թվականից հետո այլ մթնոլորտ է»,- ասաց Սիրունյանը:
Վանո Սիրադեղյանի վերադարձի համար նախաձեռնված ստորագրահավաքը, ըստ Սիրունյանի, տալու է իր արդյունքը: «Բայց Վանոն հենց այնպես չի գա, մինչև արդար դատական համակարգ չլինի»,- ասաց Սիրունյանը:
Նա նշեց, որ վերջին անգամ՝ 2000թ. ապրիլի 3-ի լույս 4-ի գիշերը ինքն է Վանո Սիրադեղյանին տանից տարել. «Ես նրան թողել եմ Սունդուկայն թատրոնի մոտ, դրանից հետո տեղյակ չեմ՝ Վանո Սիրադեղյանը երկրից գնացե՞լ է, թե՞ ոչ»: Սիրունյանի խոսքով` ինքը ապահովել է միայն այն գործընթացը, որ Սիրադեղյանը տանից դուրս գա, բայց բոլորի մոտ ստեղծվի այն տպավորությունը, թե նա տանն է: Դրանից հետո Սիրադեղյանից ոչ մի լուր չի ստացվել:
Սուրեն Սիրունյանը վստահ է, որ Վանո Սիրադեղյանը ողջ է և շարունակում է ստեղծագործել: Սիրադեղյանի նախկին թիկնազորի պետը հիշեցրեց, որ Վանո Սիրադեղյանն այն մարդն է, ում` ներքին գործերի նախարար եղած տարիներին Հայաստանում օրենքով գողեր, քրեակատարողական հիմնարկներում «զոն նայողներ» չեն եղել, վերացել են երկրում հնչող կրակոցները: Հետևաբար այդ մարդն իրավունք ունի ապրելու իր երկրում:
Սիրունյանը տեղեկացրեց, որ ինքը, որպես Սիրադեղյանի թիկնազորի պետ, երբեք չի հարցաքննվել Սիրադեղյանի դեմ հարուցված քրգործի շրջանակներում:
Հարցին` Հայ ազգային կոնգրեսն աջակցո՞ւմ է Սիրադեղյանին Հայաստան վերադարձնելու նախաձեռնությանը, և ո՞ւմ ձեռնտու չէ Սիրադեղյանի վերադարձը, Սիրունյանը պատասխանեց. «Պետք է նայել, թե ում է ձեռք տալիս, որ Վանոն վերադառնա: Արամ Մանուկյանին ձեռք տալի՞ս է, որ վերադառնա: Ես վստահ չեմ, որ Արամ Մանուկյանը շատ է ցանկանում Վանո Սիրադեղյանի վերադարձը, քանի որ ավելի քան մեկ ամիս է՝ շարժումը ձևավորվել է, իսկ ՀՀՇ վարչության անդամները դեռ տեսակետ չեն հայտնել»:
Սուրեն Սիրունյանը հիշեց Վանո Սիրադեղյանի վերջին խոսքերը. «Խնդրում եմ, որ լինեք բոլորդ միասին, երբեք ոչ մի բանի մասին չմտածեք, իմ ձեռքերը մաքուր են»:
