Լոնդոնում այս ուրբաթ մեկնարկելիք ամառային օլիմպիական խաղերի անվտանգությանը կհետևեն կրկնակի շատ բրիտանացի զինվորականներ, քան ներառված են Աֆղանստանի զորակազմում: Այս մասին հաղորդում է Independent-ը:
Բրիտանական մայրաքաղաքում խաղերի ընթացքում կարգուկանոնը կպահպանեն ընդհանուր առմամբ 18 200 զինվորականներ, մինչդեռ Աֆղանստանում Միացյալ Թագավորության զորակազմում 9500 զինվորական է ընդգրկված:
Խաղերի բացումից երեք օր առաջ բրիտանական կառավարությունը հայտարարել է զինվորականների թիվը 1200-ով ավելացնելու մասին: Մինչ այդ արդեն 17 հազար զինվորականներ մասնակցում էին օլիմպիական օբյեկտների և միջոցառումների պահպանությանը:
«Փորձում ենք հնարավորինս նվազեցնել անկանխատեսելի միջադեպերի հավանականությունը»,- հայտնել է Օլիմպիական և Պարաօլիմպիկ խաղերի լոնդոնյան կազմկոմիտեի գործադիր տնօրեն Փոլ Դեյթոնը: Նրա խոսքով` որոշումն ընդունվել է զինվորականների խորհրդով:
Ռեսուրսների հավելումը բացատրվում է անվտանգության G4S մասնավոր ընկերությունում որակավորված անձնակազմի բացակայությամբ: Հենց այդ ընկերությունն է պատասխանատու խաղերի անվտանգության համար: Ներկայում ընկերությունը տրամադրել է 6000 անվտանգության աշխատակից` պայմանագրով նախատեսված 10,4 հազարի փոխարեն:
Խաղերի ընթացքում մայրաքաղաքում պարեկային ծառայություն կիրականացնեն 12,5 հազար ոստիկաններ:
