Ինչպես գրում է ռուսական Комсомольская правда թերթը` հղում կատարելով The New York Times-ին, ԱՄՆ նախագահ Բարաք Օբաման և պետքարտուղար Հիլարի Քլինթոնը լուրջ հակասություններ են ունեցել Եգիպտոսում տեղի ունեցող իրադարձությունների ժամանակ: Հավանաբար հենց սրանով էր պայմանավորված ամերիկյան վարչակազմի ոչ միանշանակ և հակասական գնահատականները Մուբարաքի վարչակազմի հեռանալու հնարավորությունների վերաբերյալ:
Ըստ այդմ, թերթին պարզել է դարձել, որ Օբաման շատ դժգոհ է եղել պետքարտուղարի գործողություններից, որը հաճախ վատ դրության մեջ էր դնում Օբամային: Հակասություններն առաջացել են այն ժամանակ, երբ ներեգիպտական առճակատման ամենավճռական պահին պետքարտուղարությունը բավականին փափուկ դիրքորոշում է որդեգրել, որը լրիվ հակասում էր Սպիտակ տան կողմից արտահայտված դիրքորոշմանը:
Օբամային վրդովեցրել է այն հանգամանքը, որ Ֆրենկ Վիզերը, որն իրականացնում էր միջնորդական գործունեություն` մի սեղանի շուրջ հավաքելով եգիպտական տարբեր ուժերի` փորձելով գտնել ստեղծված իրավիճակից ելքերը, Մյունխենի անվտանգության հարցերով համաժողովի ըթնացքում հայտարարել էր, որ Մուբարաքը պետք է մնա իր պաշտոնին և բարեփոխումներ իրականացնի: Բացի այդ, Քլինթոնը նույն համաժողովում ասել էր, որ անցումային փուլը բավականին երկար կտևի` հասկացնելով, որ ԱՄՆ-ն չի շտապում Մուբարաքի հեռանալու հարցում:
Օբաման, ինչպես հիշում ենք, լրիվ այլ կարծիք էր հայտնում` պահանջելով իշխանության փոխանցում շատ կարճ ժամանակահատվածում: Այս հակասությունները եզակի չեն: Նմանատիպ դեպքեր նախկինում էլ են եղել, և հիմնականում կապված են Օբամայի անվտանգության հարցերով խորհրդական Սամանտա Պաուելի և Հիլարի Քլինթոնի ունեցած հակասություններով:
Հայտնի է դարձել նաև, որ Օբաման հրահանգել է Կոնգրեսի միջազգային հարաբերությունների հանձնաժողովի նախագահ Ջոն Քերրիին կտրուկ անդրադառնալ այս խնդրին և քննադատության ենթարկել ամերիկյան դիվանագիտությանը` Եգիպտոսի հետ կապված հարցերում ունեցած նման դիրքորոշման համար: Բացի այդ ԱՄՆ Սպիտակ տան մամուլի խոսնակ Ռոբերտ Գիբսին էլ հրահանգվել էր հստակ ներկայացնել Օբամայի կոշտ դիրքորոշումը Մուբարաքի հեռանալու վերաբերյալ:
Սակայն, նշում է թերթը, Օբաման փորձել է իրեն հանգիստ դրսևորել հրապարակային հայտարարությունների ժամանակ` հնարավորինս քողարկելով տեղ գտած հակասությունները:
