Փետրվարի 10-ի ՀՀ կառավարության որոշումը, համաձայն որի, գայլ սպանելու համար այսուհետ յուրաքանչյուր որսորդ պետք է ստանա պարգևատրում 100 հազար դրամի չափով, վրդովմունք է առաջացրել ՀՀ բնապահպանների շրջանում:
Եթե կառավարությունը իր քայլը բացատրում է որպես գյուղացիներին գայլերի հարձակումներից պաշտպանելու միջոց և հիմնավորում գայլերի թվաքանակի աճով, ապա այս մասին բոլորովին այլ կարծիքի են բնապահպանները:
Էկոլոգիական հասարակական դաշինքի համակարգող, «Թռչնասերների կենտրոն» ՀԿ նախագահ Սիլվա Ադամյանի կարծիքով, այս որոշման հետևանքով գայլերի որսը կարող է ամբողջությամբ դուրս գալ վերահսկողությունից և հանգեցնել գայլերի պոպուլյացիայի ոչնչացմանը:
Իսկ ինչ վերաբերում է շրջանառվող այն նորություններին, թե գայլերի թիվը շատացել է, բնապահպանը այլ հիմնավորում է բերում. «Գայլերը ուղղակի մեր աչքի առաջ են դուրս եկել, ոչ թե շատացել: Նրանք կորցրել են իրենց բնադրավայրերը, կեր հայթայթելու հնարավորությունները, և սա է պատճառը, որ նրանք հարձակվում են բնակավայրերի վրա, իսկ մենք փորձում ենք նման մեթոդներով մեր իսկ արած հանցագործությունները բարդել կենդանիների վրա»,- ասաց Սիլվա Ադամյանը:
Ի դեպ, էկոլոգիական հասարակական դաշինքն արդեն իսկ պատրաստվում է նամակով դիմել ՀՀ բնապահպանության նախարարություն և ՀՀ կառավարություն՝ անհամաձայնություն հայտնելով որոշման հետ կապված։ Իսկ ինչը բնապահպաններին ավելի է զայրացնում, այն է, որ նման որոշումներ ընդունելիս կառավարությունը չի փորձում ոչ որևէ բնապահպանի հետ խոսել, ոչ էլ գոնե հասարակական լսումներ կազմակերպել:
