«Սիրիայում ստատուս-քվոն այնքան է խախտված, որ հետդարձ հնարավոր չէ»,- այսօր լրագրողների հետ հանդիպմանը անդրադառնալով Սիրիայում տեղի ունեցող դեպքերին՝ նշեց «Ժառանգություն» կուսակցության անդամ Ստյոպա Սաֆարյանը:
Ինչ վերաբերում է ՀՀ դերին, Ս. Սաֆարյանի կարծիքով` Հայաստանի լռությունը վտանգավոր է այս ֆոնին:
«Գոնե հայկական էլիտային պետք է հետաքրքրեր, թե ինչ զարգացումներ են հնարավոր, և ինչպես է պետք արձագանքել դրանց: Հայաստանը մեծ ներուժ կարող է ունենալ, բայց ես մինչև հիմա չեմ տեսել որևէ բանավեճ այս խնդրի շուրջ: Բացի վարկային և այլ բնույթի համաձայնագրերին կնիք դնելուց` տարածաշրջանային խնդիրների շուրջ որևէ քննարկում տեղի չի ունենում»,- ասաց նա` հավելելով. «Եթե չգիտենք, թե ալիքը ուր է հասնելու, ինչպե՞ս կարելի է պլանավորել գործողությունները»:
Ս. Սաֆարյանի խոսքով՝ տարածաշրջանային զարգացումների հաջորդ հանգրվանը Իրանի խնդիրն է. «Եթե միջուկային ծրագրերի փորձարկումները շարունակվեն, ապա Իրանը 2013-2014թթ. կարող է համարվել միջուկային տերություն»:
Իսկ թե իշխանության անցումը ընդդիմությանը ինչպես կազդի Սիրիայում գործող տարբեր համայնքների վրա, Ս. Սաֆարյանը հայտնեց. «Իրաքի օրինակը բավական է` հասկանալու համար, թե ինչ կլինի հայկական համայնքի հետ: «Ժառանգություն»-ը գտնում է, որ, այո՛, Հայաստանը պարտավոր է ընդունել փախստականների ալիքը»:
