Թուրքական Doğan լրատվական գործակալության փոխանցմամբ՝ Սիրիայում շարունակվում է քաոսային իրավիճակը: Այդպիսի իրավիճակում Թուրքիայի սահմանի մոտ ընկած մի շարք բնակավայրեր հայտնվել են քրդական խմբերի ձեռքում: Վերջիններս այդ վայրերում իջեցրել են Սիրիայի դրոշը և փոխարենը տեղակայել Հյուսիսային Իրաքի քրդական ինքնավարության դրոշը:
Թուրքական մամուլը նշում է, որ Սիրիայի քրդերն առաջ են շարժվում Իրաքի քրդերի ճանապարհով և ցանկանում են ստեղծել սեփական ինքնավարություն: Ավելին, այդ հարցում նրանց աջակցում է Հյուսիսային Իրաքի քրդական ինքնավարության ղեկավար Մասուդ Բարզանին, որը Սիրիայի քրդաբնակ տարածաշրջանի պահպանման համար նախապատրաստական ու ուսուցողական աշխատանքներ է իրականացնում նրանց շրջանում:
Հիշեցնենք, որ ավելի վաղ թուրքական մամուլը հայտնել էր, թե Թուրքիայի սահմանին մոտ ընկած Սիրիայի տարածքում տեղակայվել է Թուրքիայում ահաբեկչական հռչակված ու արգելված Քրդստանի աշխատավորական կուսակցության (PKK) դրոշը:
